Ég skil ekki hvað þetta er með hann Rúnar. Þessi prúði drengur lætur alveg eins og fífl. Það geri ég reyndar líka en ég er hins vegar ekkert óvön því. Gunna á Ási heldur að það sé af því að hann hefur alltaf verið ofverndaður og nú er hann frjáls. Ég er líka ofvernduð en ég gat samt hegðað mér kjánalega í gamla skólanum en ekki hann af því að foreldrar hans voru alltaf nálægir.(1) Foreldrar eru mjög óhollur félagsskapur til lengdar. Ég er mjög glöð yfir því að hafa mömmu ekki alltaf ofan í hálsmálinu á mér lengur.

(1. Foreldrar Rúnars unnu við skólann.)

Ég þoli ekki mömmu. Hún kom í skólann með fullt af nammi harðfisk og allskonar og það var ágætt. En Ásgeir í 9. bekk hélt að hún væri 18 ára og fannst hún mjög myndarleg. Eins og Ásgeir er skemmtilegur strákur. En hann tekur ekkert eftir mér og finnst ég örugglega algjört smábarn. Við töluðum helling um Guð og kirkjuna í gærkvöldi og þegar ég fór heyrði ég hann segja við Kidda að ég væri mjög spes krakki. Semsé krakki en ekki stelpa. En hann er samt mjög fínn. Mér er hinsvegar illa við Kidda. Hann er heimskur monthani en þeir Ásgeir eru svo miklir vinir að maður getur ekki talað mikið við Ásgeir nema þurfa að tala við Kidda líka. Ég er samt ekki hrifin af Ásgeiri en mér finnst samt ekkert gaman að hann skuli vera svona heillaður af mömmu minni.

Helgi er hrifinn af mér. Í dag fórum við út í líffræðitímanum og hann bar mig yfir lækinn. Mér finnst gaman að einhver skuli vera hrifinn af mér en mér finnst leiðinlegt að það skuli vera hann. Hann er áreiðanlega góður strákur en hann líkist helst gömlum bónda og er ekki myndarlegur. Ég er samt almennileg við hann enda er ég sjálf ljót og ljótt fólk á ekkert skilið að aðrir séu ekki almennilegir við það. En ég vildi samt að einhver annar væri hrifinn af mér en ég veit ekki hver ég vil að sé það. Allavega ekki Diddi Dóri.

Ég er búin að læra fullt af nýjum orðum sem ég veit ekkert hvað þýða. Eins og t.d. snípur og fróa sér. Mér finnst snípur vera ógeðslegt orð. Það hljómar eins og lítið hárlaust nagdýr. En það er ekkert svoleiðis heldur eitthvað dónalegt. Ég er ekki viss en ég held að “fróaðu þér” sé bein þýðing á “fokk you”. Það er líka rökrétt af því að fróa er áreiðanlega skylt fræ. Samt held ég að það sé ekki beint að gera það heldur svipað og að rúnka sér en rúnka sér er ekki að ríða, heldur eitthvað eins og það sem skeður þegar maður rennir sér niður handrið. Það er allavega talað um að rúnka sér á handriðinu þannig að það hlýtur að vera það.

Ég er frekar klár í því að nota orð sem ég skil ekki. Það er kannski af því að merkingin skiptir ekki svo miklu máli ef maður er eitthvað að dónast. Ég veit allavega að lessa er kvenkyns hommi. Stundum dettur mér í hug að ég sé svoleiðis af því mér finnst svo fallegt að sjá sumar stelpurnar berar. En ég er samt örugglega ekki svoleiðis af því mér finnst bara gaman að tuskast við stráka en ekki stelpur. Brjóst eru mjög falleg en ég vil ekki hafa þau utan í mér. En það er gaman að slást við stráka sem eru ekki mjög sterkir en samt sterkari en ég.

Í dag fórum við í sund og strákagerpin reyndu að draga sundbolina af okkur. Brjóstin á Siggu fóru alveg upp úr og hún var alveg brjáluð. Villi í mínum bekk kaffærði mig og ég varð mjög hrædd. Ég er ekki hrædd við að deyja en ég er samt hrædd við að drukkna. Og svo var ég öskureið af því að það sást alveg að ég var hrædd og mér fannst það ekki gaman. Ég henti fötunum strákanna í sundlaugina og svo hlupum við allar upp í skóla. Ég flúði inn á herbergi til Sillu og Siggu en strákarnir sóttu mig og báru mig fram á gang og rennbleyttu mig. Þetta var samt gaman. Allur gangurinn er rennandi blautur núna en við reyndum samt að þurrka það mesta upp. Ég verð eiginlega að læra að synda. Annars verð ég annað hvort drepin eða klædd úr næst þegar ég fer í sund.

Það eru allir vitlausir í karamellur í þessum skóla. Þegar einhver fer í bæinn er hann alltaf beðinn að kaupa karamellur fyrir milljón manns. Ég hef aldrei fattað hvað karamellur eru æðislegar en þær eru það. Helgi horfir mikið á mig. Ég held að hann sé kannski hrifinn af mér. Ég er ekki hrifin af honum.

Það er gaman í skólanum og mér gengur vel í öllu. Líka stærðfræði. Þorgeir (1) er snargeggjaður en hann er samt alveg almennilegur við mig. Villa fer í taugarnar á mér og enskubókin er alltof barnaleg en það er samt alveg gaman að læra ensku. Samt fíflumst við helling í enskutímum. Það er bara bull að það sé vondur matur hérna. Að vísu er sagógrautur ógeð en þá borðar maður bara brauðið. En það er svolítið skrýtið að krakkarnir hérna kunna ekki borðsiði. Þau brytja allan matinn í litla bita og halda á gafflinum í hægri hendi og kunna ekki að beita súpuskeið. Það er sjálfsagt af því að þau eru úr sveit. Guðrún gamla er ekki með neinar augnbrúnir. Hún málar á sig strik en þau eru rammskökk. Ég reyni að glápa ekki mikið á hana en það er erfitt af því að þetta er svo skrýtið.

(1. Þorgeir var stærðfræðikennarinn sem hótaði að höggva af okkur hausinn.)