Kunningi minn hefur sent mér athyglisvert bréf sem á vissulega erindi við almenning og leyfi ég mér hér með að birta það ásamt svari mínu.

Viðvörun frá lögreglu og karlaathvarfinu

Lögreglan vill hvetja alla karlmenn, einkum þá sem stunda næturlíf, ráðstefnur, jólahlaðborð og knæpur, til að vera vel á verði og afar varkára þegar kvenfólk býður upp á drykk.

Komið er á markaðinn stórhættulegt efni, svonenfdur „bjór“ og er fjöldi kvenna farinn að nota efnið til þess að herja á menn sem eiga sér einskis ills von.

Venjulega er efnið í fljótandi formi og fæst nú næstum hvar sem er. Það er til á flöskum, dósum, úr krana og jafnvel í stórum kútum.

Kvensniftirnar nota „bjór“ í samkvæmum og á börum til þess að véla karlkyns fórnarlömb heim með sér og í bólið. Venjulega nægir konunni að fá karlmanninn til að innbyrða nokkrar einingar „bjórs“ og bjóða honum síðan heim til kynlífs án nokkurra skuldbindinga. Þessar aðfarir duga til þess að gera karlmenn gersamlega bjargarlausa.

Eftir neyslu margra „bjóra“ kemur iðulega fyrir að menn falla í þá freistni að stunda kynlíf með kvenfólki sem þeir að öllu jöfnu myndu aldrei líta á. Að lokinni „bjórdrykkju“ vakna karlmenn oft án þess að muna glöggt hvað gerðist nákvæmlega kvöldið áður, gjarna þó með sterkt hugboð um að eitthvað slæmt hafi átt sér stað.

Stundum kemur það fyrir að þessir ólánsmenn eru dregnir inn í þekkta svikamyllu sem kallast „samband.“ Vitað er um tilfelli þar sem kvenfólki hefur tekist að hneppa karlmenn í langvarandi og alvarlega útgáfu þrældóms, refsinga og niðurlægingar sem kallast „hjónaband“.

Að því er virðist eru karlmenn líklegri til að verða fórnarlömb þessarar svikamyllu eftir að kvenmaðurinn er búinn er að neyða í þá „bjór“ og lofa kynlífi.

Ef þið eruð þegar fórnarlömb þessa hræðilega nýja efnis, „bjórs“, og kvenþrjótanna sem beita því er rétt að benda á sérstaka stuðningshópa karlmanna sem búið er að koma á fót á flestum þéttbýlisstöðum, en í þessum
hópum má ræða sín vandamál á opinskáan og ærlegan hátt við karla sem margir hverjir hafa lent í þessum hremmingum.

Finna má þessa stuðningshópa í símaskrá víðast hvar undir heitinu Golfklúbbur.

Svar

Sæll félagi og þakka þér þessar gagnlegu upplýsingar.

Mér segir reyndar svo hugur um að einhver misskilningur sé á ferðinni varðandi bjórinn og auðflekanleika karlmanna. Ég hef sjálf áratuga langa reynslu af því að fífla menn, ekki eingöngu til bólfara heldur einnig ýmissa annarra viðvika og hef ég iðulega náð fram vilja mínum án þess að þurfa að kosta til þess þeim fokdýra drykk sem getið er um í bréfi þínu.

Í fyrsta lagi er sjaldgæft að þurfi að ginna menn til bjórþambs. Bjór innbyrða menn jafnan af fúsum og frjálsum vilja og oftast fleiri en einn í einu. Það mun heyra til algerra undantekninga að kvenfólk bjóðist til að greiða fyrir drykki karla á bar enda mun hagkvæmara að slá tvær flugur í einu höggi og láta fávitann um útgjöldin.

Í öðru lagi er varla til sá karlmaður sem ekki er einfaldara að táldraga edrú en drukkinn. Reynslan sýnir að karlmenn elta typpið á sér til Tálknafjarðar ef því er að skipta og er þá heppilegt að maðurinn sé í ökuhæfu ástandi. Eftir fáeina drykki er hinsvegar algengt að viljinn sé ekki í réttu hlutfalli við getuna auk þess sem drukknir menn eru jafnan leiðinlegir og eiga erfitt með að átta sig á kurteislegum ábendingum um að þeir séu búnir að gegna hlutverki sínu og eigi nú að pilla sig heim.

Kona sem ætlar sér að fífla karlmann til fylgilags við sig ætti því fyrir alla muni að forðast að bjóða fíflinu drykk en halda sig við hinar kvenlegu aðferðir sem hafa gefist sem best í gegnum tíðina. Konan þarf þannig að hafa í huga að maðurinn er í eðli sínu veiðimaður og er viðkvæmur fyrir beinum skilaboðum um áhuga konunnar. Besta leiðin til að fá manninn til að lúta vilja konunnar er því sú að klæðast stuttu pilsi og fylltum brjóstahaldara, sitja nokkrum borðum fjær manninnum (helst neðar en hann því það vekur villidýrslega yfirburðatilfinningu hans) blaka augnhárunum feimnislega og væta varnirnar með tungunni, ekki þó á svo áberandi hátt að það teljist glyðrulegt.

Sé þessi aðferð viðhöfð líður ekki á löngu þar til bjáninn kemur hlaupandi með lafandi tungu og býðst til að borga drykki dömunnar. Kæri daman sig um að hafa kynferðisleg afnot af manninnum ætti hún strax á þessu stigi að gefa í skyn að hún hafi áhuga á því að stunda með honum skuldbingarlaust kynlíf HEIMA HJÁ HONUM. Þetta má þó aldrei segja með berum orðum því þá verður maðurinn hræddur og heldur að hún ætli að gera kröfur til hans. Árangursríkara er að gera sér upp almenna ófullnægju, t.d. gefa í skyn að hún hafi verið karlmannslaus lengi, til að gefa manninum færi á að sanna hæfileika sína til að bæta úr líðan hennar. Konan ætti alltaf að hafa í huga að karlmenn fúnkera ekki almennilega nema þeir hafi eitthvað til að „sanna“. Konan ætti aldrei að vera svo vitlaus að bjóða karlmanni heim með sér. Það gæti orðið til þess að hún sæti uppi með hann lengi nætur og í verstu tilvikum að hann sofni í rúmi hennar, taki óhóflega mikið af rúmplássinu og haldi jafnvel fyrir henni vöku með hrotum.

Það er rétt sem kemur fram í viðvöruninni að konur eiga það til að draga menn inn í svikamyllu sambúðar eða hjónabands. Það eru þó eingöngu óreyndar, illa upplýstar eða mjög þrjóskar konur sem fara þá leið til að nýta sér vinnuframlag og tekjur mannins. Reynslan sýnir að þrátt fyrir hæfileika karla til að beita borvél og flytja húsgögn, fylgja þeim óþrif og umstang sem eykur á vinnuálag konunnar ef eitthvað er. Fjárhagslega er líka vafasamt af það borgi sig til lengdar að taka að sér karlmann, þar sem þeim fylgja tíðum meðlagsskuldir og fjárhagsóreiða sem erfitt er að sjá fyrir þegar garmurinn dregur upp kreditkortasafnið til að borga drykki á bar.

Aukinheldur skyldi kona sem stofnar til sambúðar ávallt hafa í huga að hún er þar með búin að taka að sér áralanga sálgæslu og áfallahjálp því það er alveg sama hversu gamlir menn verða og hve mikla reynslu þeir öðlast; í hjarta sér er karlmaðurinn alltaf sama litla eilífðarblómið sem hnígur í fang konunnar með titrandi tár ef hann heldur að einhver annar karl sé honum fremri og tilbiður Guð sinn og deyr ef hann gerir sér grein fyrir því að hann hefur orðið að lúffa fyrir kvenmanni.

Ég mæli því eindregið með því að að í stað þess að draga karlmann í sambúð eða hjónaband, fari konan þá leið að láta manninn borga fyrir sig drykki á bar út á einn snöggan inni á klósetti. Það er fljótlegt, hefur lítið vesen í för með sér og auðvelt að komast hjá tilgangslausum forleik án þess að móðga manninn.

Sömu aðferð má nota ef konan þarf á karlmanni að halda heima við. Píparinn, smiðurinn, rafvirkinn, allt eru þetta menn sem má hafa ákveðin not af og alger óþarfi að taka að sér barnagæslu um helgar eða elda ofan í þá í staðinn. Mun skynsamlegra er að koma til dyranna í stuttu pilsi og helst brókarlaus ef þú þarft á þjónustu slíkra manna að halda. Þegar þú hefur gengið úr skugga um að maðurinn sé örugglega kvæntur og eigi auk þess að mæta til annarra verka fljótlega, má gefa til kynna að þú hafir þörf fyrir þjónustu hans í bælinu líka. Mun það örugglega verða til þess aðhann gleymi reikningum en ef maðurinn er ekki þeim mun ókræsilegri má einnig ganga svo langt að taka stutt skemmtiatriði á eldhússborðinu (ATH. að bjóða karlmanni ALDREI inn í svefnherbergið þitt, enda þótt hann sé ódrukkinn, kvæntur og í tímaþröng) og láta hann greiða fyrir það sem svarar 10-20 klst vinnu eftir því hver gjaldskráin er.

Ef þú ert heppin mun slíkur maður kynna þig fyrir golfklúbbnum sínum og þar með muntu aldrei framar upplifa þá örvæntingu sem rekur konur til þess að reyna að ginna karla í hjónaband.

Hafi konan löngun til þess að niðurlægja karlmenn og refsa þeim er alger óþarfi að leggja á sig þá vinnu og amstur sem fylgir hjónabandi. Það er alveg nóg að hafa hugfast að ekkert í veröldinni þykir manninum jafn niðurlægjandi og að það að tapa í ímyndaðri samkeppni. Konan þarf því ekkert að gera til að kvelja manninn, annað en að mæta í sömu samkvæmi og hann -í stutta pilsinu- gefa til kynna áhuga á því að rifja upp gömul kynni á klósettinu, missa svo skyndilega áhugann en verða hinsvegar tíðrætt um andlegt og líkamlegt atgervi annarra karla og þá einkum þeirra sem hálfvitinn ber sig saman við. Hún ætti svo að ganga enn lengra með því að láta vel að vinum hans, vinnufélögum eða bræðrum, hlæja að skemmtilegheitum þeirra og mæna á þá hundslegum aðdáunaraugum ef þeir segja eitthvað gáfulegt. Slíkar aðgerðir hafa valdið meiri niðurlæginu, afbrýði, reiði og biturð, og haft í för með sér alvarlegri mannskaða en allt það ofbeldi sem hefur átt sér stað í hjónaböndum Íslandssögunnar samanlagt.

Telji konan æskilegt að losa veröldina við manninn er árangursríkasta aðferðin sú að koma því svo fyrir að kona verði fyrir valinu þegar þau sækja bæði um yfirmannsstöðu hjá fyrirtækinu. Eftir það mun maðurinn sjálfur fremja faglegt harakírí og ef vel tekst til falla fyrir eigin hendi eftir það.