Í minningunni
eins og hlý, gömul peysa.
Dálítið trosnuð á ermunum
og löngu úr tísku.
Þó svo hlý, svo mjúk
á köldum vetrarmorgni.
Svo var mér vinátta þín.
Sett í skúffuna í ágúst 1985
Greinasafn fyrir flokkinn: Allt efni
Kveðja
Dánir.
Að eilífu.
Runnir í tómið
dagarnir,
þegar allt mitt var þitt
og hugsanir þínar
-titrandi
bak við augnlokin.
Sett í skúffuna í júlí 1985
Elskan litla (þykjustusaga um alvöruleiki)
Þú segir ást þína beislaða, stillta.
Segist elska mig sem góðan vin.
Annað segja vorbjört augu þín.
Sem þú lokar
þegar hjarta þitt tekur að titra.
Mokka
Hjarta mitt,
titrandi blekdropi
á oddi pennans.
Ljóð,
nema hönd mín skjálfi.
Klessa
ef þú lítur í átt til mín.
Nei. Bara klessa.
Jafnvel þótt þú lítir aldrei
í átt til mín
nema einu sinni
til að teygja þig í öskubakka.
Ljóð mitt,
sígarettureykur,
líður þér um varir,
leysist upp.
Þú varst blekklessa,
þú varst reykjamökkur
á Mokka.
Á eftir
Það streymir.
Það flæðir.
-Eitt óp.
Og svo er því lokið
með rennilásshljóði.
Ég ligg hér
svo brothætt,
svo tóm
eins og skel í fjöru
og hlusta
á fótmál þitt hljóðna.
Og óveruleikinn
með deginum inn í mig smýgur
þótt ilmur þinn
loði ennþá við sængina mína,
og samt eru vorhljóð
í rigningu fuglarnir syngja
og veröldin lyktar af ösp.
Það er vor.
-Það er ljósgrænt.
Sett í skúffuna í apríl 1983