Búllmundur vill ekki ráða mig sem súludansara. Ég skil ekkert í honum. Eins og gekk nú ljómandi vel hjá mér þessa einu vakt sem ég tók áður en ég veiktist. Mér skilst að það standi í einhverju sambandi við það hvað útlensku stelpurnar eru óánægðar með kaup og kjör.
„Búin að gera stelpurnar snarvitlausar og ætlast svo til að ég ráði þig í vinnu, hvílík ósvífni“ hvæsti Búllmundur. Mér skilst að senan hafi verið á þessa leið
Yana: „Eva segja að þú skal borga meira svo ég fá lufaurissjóð!“
Susan: „Eva segja ólögglega að þú taka pening fyrir ríða. Þú bara taka pening fyrir glenna, ég fá ríðapening sjálf!“
Búllmundur kotroskinn: „Jæja já, hún hefur kannski líka sagt ykkur að þið séuð ólöglegir innflytjendur og að vændi sé ólöglegt? – Hvað þykist þið ætla að gera? Tala við lögguna? (Skellihlátur.)
Yana: „Nei, ég ekki tala lugga. Eva segja lugga kúkalabb. Ég tala blaþamaðar!“
Þannig að nei, ég fæ ekki að gera glennu á Kynlegum konum.
Ég spurði hvort vantaði þá ekki á barinn. „Hef reyndar aldrei afgreitt á bar og finnst það ekki spennandi en gæti trúað að þjónagreyin hefðu gott af upprifjun á kjarasamningum.“
Hann henti mér út um gluggann, ég er bara heppin að staðurinn er í niðurgröfnum kjallara en ekki á 5. hæð.
Réð mig í hálft starf við þrif á gistihúsi dag. Hef ekki fengið nægilega mörg verkefni til að ná endum saman og farin að ganga á varasjóðinn. Verð eitthvað að gera til bráðabirgða og það eru þó allavega fastar tekjur.