Ég hef ekkert tjáð mig um skopmyndamálið fyrr en nú. Hef bara ekkert um það að segja sem aðrir mér ritfærari og vinsælli hafa ekki þegar sagt. Þessvegna finnst mér svolítið dapurlegt til þess að vita að fólk sem ég taldi fremur skynsamt virðist ennþá, eftir alla þessa umræðu líta á málið sem talandi dæmi um húmorsleysi og trúarofstæki múslima. Halda áfram að lesa
Karlmennskan
Sáum Naglann í kvöld. Það sem mér líður alltaf vel í leikhúsi. Ég skil það ekki sjálf.
Hvað er karlmennska?
Mér fannst dálítið stingandi hve margir viðmælenda tengja saman karlmennsku og heiðarleika. Ef heiðarleiki er karlmannlegur er óheiðarleiki þá kvenlegur?
Karlmennska er að mínu viti fólgin í því að fá kikk út úr því að gera ýmislegt sem veldur mér sálarangist. T.d. að bera þunga hluti og beita höggborvél.
Bara svo það sé á hreinu er karlmennska ekki forsenda þess að ég vilji sofa hjá karlmanni.
Ég er samt ekki svo bjartsýn að gera mér vonir um að finna einhvern sem er 26 ára leikhússrotta, skegglaus, fíknlaus, fjárhagslega heilbrigður, klár og skemmtilegur, búinn að afgreiða allar barneignir, trúlaus, pólitískt meðvitaður morgunhani sem kann á borvél.
Nú ég ekki skilja gnarr
Mér fannst Ágústa virkilega flott á sviðinu og ef þjóðin vill endilega dissa júró þá verð ég manna síðust til gráta það. Þar fyrir er þessi fígúra sem hún leikur ósköp einhæf og þreytandi.
Jón Gnarr segir í Fréttablaðinu í dag að RUV hafi brugðist því hlutverki sínu að vernda íslenska tungu með því að vanrækja dagskrárgerð fyrir unga fólkið. Hann stingur upp á því að RUV bæti úr þessu með því að fá Silvíu Nótt til að sjá um áramótaskaupið.
Fyrirgefðu seinvirkni fattara míns Jón en hvernig í ósköpunum sérðu Silvíu Nótt fyrir þér sem verndara íslenskar tungu og menningar?
Frekja
Í morgun stöðvaði ég bílinn tvisvar sinnum til að hleypa gangandi fólki yfir götu. Í bæði skiptin sáu ökumenn bílanna fyrir aftan mig ástæðu til að þenja flautuna. Í öðru tilvikinu stoppaði ég á grænu gangbrautarljósi. Í hitt skiptið við elliheimili. Halda áfram að lesa
Er íþróttaálfurinn útsendari Orkuveitunnar?
Ég hef ekki kynnt mér þetta orkuátak íþróttaálfsins sérlega vel en ég veit að það er mikil orka í súkkulaði en engin í vatni. Þessvegna finnst mér svolítið skrýtið að börn fái orkustig fyrir að drekka vatn en ekki fyrir að gúlla í sig sælgæti. Ætli sé kannski reiknað með því að vatninu sé hvolft ofan í þau og fallþungi þess nýttur til raforkuframleiðslu?
Aldrei hef ég heyrt neinn tala um orkuátak þegar fullorðið fólk forðast óhollan mat og hreyfir sig. Venjulega er svoleiðis átak kallað megrun eða þjálfun. Markmiðið er að brenna orku, byggja upp vöðva og auka úthald. Sé þessu haldið áfram lengur en nokkrar vikur heitir það heilsusamlegt líferni.
Markmið Latabæjar er væntanlega að hvetja til heilsusamlegs lífernis með nokkurra vikna hreyfingar- og hollustuátaki (þótt reyndar sé vafasamt að allt sem gefur orkustig sé hollt). Hversvegna í ósköpunum það er kallað orkuátak er mér hulin ráðgáta.
Sonur minn Byltingin telur það vísbendingu um að íþróttaálfurinn sé á mála hjá Orkuveitu Reykjavíkur og öðrum útsendurum Stóriðjudjölufsins. Ég efast um það. Held að þetta sé bara venjulegt málfarsklúður.
Þetta var málfarsnöldur dagsins. Titillinn er bara eyrnakrækja.
leytast eftir kinlýfi
Í dag er það orðatiltækið að leita eftir eða að leitast eftir sem ég ætla að nöldra yfir.
Við leitum að hlutum eða sækjumst eftir þeim og leitumst við að finna bestu lausnina.
Ennþá hroðalegri útgáfa af þessu klúðri er algeng á vefnum einkamal.is. Þar er nokkuð um að giftir mennn og graðir, sætir og saklausir eða feitir og forvitnir séu að leytast eftir kinlýfi. (Gjarnan með börnum ef eitthvað er að marka Kompás.)
Afhverju er samkynja samband betra?
Ég átta mig nú ekki alveg á þessu. Af hverju ætti fólk frekar að vilja pappírshjónaband við einhvern af sama kyni? Varla skiptir máli þetta lagaákvæði um að það þurfi að “liggja fyrir” að hjónabandið hafi verið “fullkomnað”? Ef fólk er tilbúið til að giftast einhverjum fyrir ríkisborgararétt, er það þá ekki alveg eins tilbúið til staðfesta að slík “fullkomnun” hafi átt sér stað? Varla getur það “legið fyrir” á annan hátt.
Annars finnst mér voða skrýtið þetta orðalag að hjónabandið hafi verið “fullkomnað”. Ég held að í hinum vestræna heimi amk sé algengast að fólki fullkomni með sæg manna og/eða kvenna sem það er ekki gift.
Ég var einu sinni gift manni. Það var svosem ágætt hjónaband en mjög langt frá því að vera fullkomið. Samt eignaðist ég tvö börn með honum.