1. Heyr barn 21. aldarinnar. Ég er Drottinn Guð þinn, sem stjórna verðbólgunni, genginu og öllu öðru sem enginn botnar í og er engum að kenna. Þú skalt endilega hafa sem flesta guði en skipa mér í 1. sætið.

2. Forðast skaltu að gefa mér eða öðrum guðum nafn því það gæti orðið til þess að einhverjum dytti í hug að þú sért ósjálfstæður og þig skorti sjálfstraust.

3. Gættu þess að fylla sérhverja frístund af ýmisskonar afþreyingu, svo það hendi þig aldrei að sitja bara og bora í nefið og hugsa um ekki neitt.

4. Sýndu engum manni virðingu. Slíkt er í skásta falli sleikjuháttur en oftast merki um veikgeðja karakter sem skortir sjálfsálit.

5. Reyndu að komast hjá því að drepa neinn. Ef þú vilt eyðileggja líf einhvers er alltaf hægt að gerast lögfræðingur eða blaðamaður.

6. Ríddu sem allra flestum á sem furðulegustum stöðum og talaðu um það við hvern sem er en láttu ekki nokkurn mann vita af þeim pervasjónum þínum sem ekki eru almennt viðurkenndar, svo sem smekk fyrir bakraufarmök og flengingar.

7. Þú skalt ekki láta nappa þig ef þú stelur almannafé. Leyfilegt er þó að svíkja undan skatti, skrifa á sig óunna yfirvinnutíma og fá sér ýmis fríðindi svo framarlega sem starfsmenn Byko eru ekki með nefið ofan í fjármálunum þínum.

8. Reyndu að komast hjá því að ljúga opinberlega. Það er svo miklu huggulegra að láta bara satt kyrrt liggja eða hagræða pínulítið. Í einkalífinu er þó heimilt að ljúga þegar þess gerist þörf, því ekki viljum við nú særa neinn.

9. Þú skalt leggja þig fram um að auka hagvöxtinn með gengdarlausri neyslu, hlusta samviskusamlega á eins margar auglýsingar og þú kemst yfir og FARA EFTIR ÞVÍ sem þær boða þér.

10. Þú skalt ekki spyrja heimskulegra spurninga, sýna tilfinningasemi á almannafæri, keyra eins og kelling né gera nokkuð annað það sem farið gæti í taugarnar á náunga þínum.

forvitni – forleikur – forlög
örvænting -örlæti – örlög
ávani – álagning – álög
þátíð – nútíð – ætíð

vona – vond – vændi – væntir