Mér þykir miður að við skyldum bjóða þér í svona leiðinlegt partý, sagði Miriam, einlæg.

Ég lyfti brúnum í forundran. Sá alls ekki þessi meintu leiðindi. Þvert á móti finnst mér notalegt að geta haldið uppi samræðum við skemmtilegt og siviliserað fólk, án þess að þurfa að öskra. Drykkjuskapur í hófi, enginn leiðinlegur, enginn grenjandi, ælandi eða haldandi ógnarlangar einræður. Ég hafði satt að segja átt von á meiri hávaða, meiri drykkju og ruddalegri umgengni í þessu byltingarafmæli.

Í alvöru! kveinaði Miriam, húsið var ennþá hreint þegar við vöknuðum í morgun. Hversu ömurlegt þarf partýið að vera til þess?

Ég býst við að börnin mín álíti hugmyndir mínar um skemmtilegheit endurspegla háan aldur minn en í fullri einlægni, ég hef aldrei skilið hvað er skemmtilegt við mixtúruna ærandi hávaði, ofurölvun, reykmökkur, óhreinir öskubakkar og bjórdósir úti um allt. Kannski er ég fædd gömul.