Þetta svar hans Kela er nú alveg tilefni til nýrrar færslu.

Það eru alls ekki allir karlar vonlausir, Keli minn, það hef ég aldrei sagt og ekki Anna heldur. Gremja okkur liggur í því hvað geðslegir menn eru óaðgengilegir. Þeir sem eru „á markaðnum“ eru:
a) ungt fólk
b) lítt frambærilegt fólk af báðum kynjum
c) nýlega fráskilið fólk (ekki tilbúið í skuldbindingarsamband) sem er ekki ennþá búið að átta sig á því að það eru meiri líkur á að finna góðan maka með því að halda sig heima og vona að nýr nágranni banki upp á í leit að rafmagnstöflunni.

Klaufaleg blíðubrögð karla (auðvitað ekkert allra heldur bara þeirra einhleypu karla sem eru hvað aðgengilegastir) standa ekki í sambandi við þekkingarskort, heldur almenna vanhæfni til þess sem mestu máli skiptir í öllum samskiptum; að hlusta, horfa og skynja. Konan er nefnilega svo skrýtin skrúfa að hún á það til að tjá sig á mjög dulúðlegan hátt. Kona gæti t.d. átt það til að segja „það er kalt hérna“ þegar hún vill að þú lokir glugganum, í stað þess að gefa beina skipun. Þetta skilur venjulegur karlmaður auðvitað alls ekki, hann heldur að hún sé að segja fréttir. Kona gæti líka tekið upp á því að færast undan, snúa sér, færa höndina á þér eða setja upp svip sem lýsir viðbjóði, ef þú snertir hana á einhvern þann hátt sem hún kann ekki að meta, í stað þess að segja „ojbara þetta er ógeðslegt hættu þessu strax eða ég kæri þig fyrir nauðgun„, sem væru auðvitað miklu skýrari boð.

Ég sé ekki alveg hversvegna hugguleg kona sem ver að meðaltali tíu tímum á viku til að styrkja vöðva, nudda burt appelsínuhúð, meika sig og maska, greiða hár og snyrta neglur, tæta hárin af skrokkum á sér með vaxborðum og klæða sig óaðfinnanlega, til þess eins að ganga í augun á körlum, ætti að hafa áhuga á því að hafa mök við eitthvað feitt og slappt sem hefur ekki hugsað um útlit sitt í 20 ár. Staðreyndin er sú að það er allt morandi í glæsilegum konum en karlmenn virðast oftar en ekki álíta að karlmannleg (og oft illa lyktandi) nærvera þeirra ein og sér nægi til þess að fá okkur uppí rúm. Því miður virðast margar konur hafa afskaplega lágan standard svo líklega eru það konur sem leggja línuna í þessum efnum sem öðrum.

Ég hef ekki þá reynslu af konum að ég geti dæmt um það hvernig þær standa sig almennt í bælinu, enda hef ég lítinn áhuga á því. Það nægir mér alveg að vita hvað ég sjálf þarf að gera til að láta karlmanni líða vel. Það veltur að mjög litlu leyti á píkudýpt, sogkrafti eða öðrum teknískum atriðum. Tæknilegasta trixið felst reyndar í því að gefa skilaboðin „segðu mér hvað þú vilt og sýndu mér hvernig“ í stað „nú skal ég aldeilis sýna þér hvað ég kann„. Mín reynsla er sú að karlmenn sækist eftir kynlífi af nákvæmlega sömu ástæðu og ég sjálf; til að fá notalega snertingu, tala um hluti sem maður talar ekki um við hvaða aðstæður sem er, draga úr einmanaleika og fá staðfestingu á því að nærvera manns skipti einhvern máli. Ef þetta snerist bara um líkamlega útrás stæði fólk ekkert í því að finna sér maka. Það er miklu einfaldara að fróa sér. Því miður virðast þessir sömu karlar oft halda að kona fari í bælið með þeim af því að hún sé með stór typpi, raðfullnægingu eða munngælur á heilanum. Það er ekki þannig kæru karlar. Konur á lausu eru nákvæmlega eins og þessar sem þið voruð að skilja við, við viljum ekki klámmyndaleikara, við viljum einhvern sem HLUSTAR, bæði á líkamstungumál okkar og það sem við höfum að segja.