Það eru allir vitlausir í karamellur í þessum skóla. Þegar einhver fer í bæinn er hann alltaf beðinn að kaupa karamellur fyrir milljón manns. Ég hef aldrei fattað hvað karamellur eru æðislegar en þær eru það. Helgi horfir mikið á mig. Ég held að hann sé kannski hrifinn af mér. Ég er ekki hrifin af honum.

Það er gaman í skólanum og mér gengur vel í öllu. Líka stærðfræði. Þorgeir (1) er snargeggjaður en hann er samt alveg almennilegur við mig. Villa fer í taugarnar á mér og enskubókin er alltof barnaleg en það er samt alveg gaman að læra ensku. Samt fíflumst við helling í enskutímum. Það er bara bull að það sé vondur matur hérna. Að vísu er sagógrautur ógeð en þá borðar maður bara brauðið. En það er svolítið skrýtið að krakkarnir hérna kunna ekki borðsiði. Þau brytja allan matinn í litla bita og halda á gafflinum í hægri hendi og kunna ekki að beita súpuskeið. Það er sjálfsagt af því að þau eru úr sveit. Guðrún gamla er ekki með neinar augnbrúnir. Hún málar á sig strik en þau eru rammskökk. Ég reyni að glápa ekki mikið á hana en það er erfitt af því að þetta er svo skrýtið.

(1. Þorgeir var stærðfræðikennarinn sem hótaði að höggva af okkur hausinn.)

Kennararnir eru líka allt í lagi held ég. Nema stærðfræðikennarinn. Hann er geðveikur í skapinu og er alltaf að hóta að höggva af okkur hausinn. Ég held ekki að hann geri það en ég er samt skíthrædd við hann.

(1. Silla og Rósa höfðu verið með mér í skóla áður svo við vorum 3 sem vorum að koma nýjar inn.
2. Rúnar hafði einnig verið með mér í bekk, bráðmyndarlegur strákur en ekkert í líkingu við þá draumóra sem ég hafði haft um væntanlega bekkjarfélaga í stóra skólanum.)

Strákarnir í 7. eru ágætir held ég. Nema Eyvindur. Hann kallar mig alltaf Mjólkurbú Flóamanna. Ég þoli hann ekki. Þeir eru samt ekkert eins myndarlegir og ég hélt. Ég held svei mér þá að Rúnar (2) sé skástur. Það eru líka allar stelpurnar hrifnar af honum. En það er allt í lagi þótt þeir séu ekki sætir því sætir strákar hafa hvort sem er ekki áhuga á ljótum stelpum. Diddi Dóri er algert gerpi og alltaf að skjóta einhverju á mig. Svo segir hann 500 brandara á dag en enginn þeirra er fyndinn. Hann er samt svolítið sætur en ég er samt ekki hrifin af honum en samt er hann stundum ágætur og ekkert heimskur.

Stelpurnar í mínum bekk eru fínar. Ég kann vel við þær af því að þær eru líka með brjóst. Ekki kannski eins hrikaleg og ég en brjóst samt. Mér finnst hinsvegar slæmt hvað það eru margar sætar. Það er ekkert gaman að vera feit og ljót í bekk með svona sætum stelpum eins og t.d. Önnu og Þórunni. Silla og Rósa (1) eru reyndar líka frekar ljótar svo ég er kannski ekki eins áberandi en þær eru samt mjög mjóar og ekki með rassinn út um allan skóla eins og ég. Ég kann vel við Ernu. Hún er með ennþá hryllilegri brjóst en ég og ekkert sérlega myndarleg. Og svo er hún skemmtileg líka og alltaf hlæjandi.

Ég var svo lánsöm að fá tækifæri til þess að ganga í heimavistarskóla sem unglingur. Ég var afskaplega verndaður krakki alin upp í litlu þorpi og það var mikil upplifun fyrir mig að koma inn í svona unglingasamfélag. Ég skrifaði dagbók á þessum árum og fór með hana og það sem í henni stóð eins og mannsmorð. Ég hef lagað mestu málfarsambögurnar í þessari dagbók, breytt nöfnum og á stöku stað hnikað til atburðum til þess að gera samhengið skiljanlegra.  Halda áfram að lesa →