Mér finnst að kurteis ætti að vera ritað kurteys. Af því að kurteysir eru þeir sem ausa kurti í allar áttir. (Þá væntanlega kurti og píi) Annars væru þeir kurtnir. Ég man allavega ekki eftir fleiri orðum með viðskeytinu -eis. Ekki einu sinni píeis.
Greinasafn fyrir flokkinn: Allt efni
Flísar
Undarlegt hvað sumt fólk hefur góða sjón
og það með bjálka skagandi út úr auganu.
Bjálka sem ná alla leið inn að rúmgafli hjá manni.
og rekast í tærnar á meðan maður sefur.
Suma daga vaknar maður
með flísar í tánum
og þorpsbúann sitjandi á rúmstokknum
rekandi bjálkann í rúmgaflinn,
með flísatöng á lofti
til þjónustu reiðubúinn.
En þrátt fyrir alla þessa hjálpsemi
hefur enginn reynt
að plokka myrkrið undan sænginni.
Gróður
Sjáðu grösin í garði nágrannans.
Saklausu, litlu kærleiksgrösin
sem teygja sig í fagurgrænni gleði í átt til sólar
og sjúga þyrstum rótum
svala úr frjósömum sverðinum.
Ó, hve þau dafna vel í þessum garði,
snyrt eftir þörfum og nærð á hverju sumri
mönnum til yndis.
Í minni lóð vex aðeins
gulur sinuflóki.
Svo rennblautur af gamalli rigningu
að hann brennur ekki einu sinni
þótt eldur sé borinn að honum.
Og þó er það eina leiðin til að uppræta hann.
Á lóðinni minni
vaxa puntstrá með haustinu.
En hver kærir sig
um þessháttar fegurð?
Ónýtt atkvæði
Mér finnst það sorglegt viðhorf að velja næstskársta kostinn, “svo atkvæðið mitt verði ekki ónýtt”.
Atkvæðið er ekki ónýtt þótt fólkið sem þú treystir komist ekki í meirihluta. Stjórnmálaflokkar þurfa tíma og stuðning til að vaxa, eins og allt annað. Það að bíða með að gefa litlum flokki, sem maður treystir, atkvæðið sitt þar til hann er orðinn stór, er svona álíka gæfulegt og að spara fóður við folald sem er efni í gæðing, af því að það getur hvort sem er ekki unnið landsmótið í þetta sinn.
Minnihluti stjórnar þjónar líka tilgangi og sterkur minnihluti skiptir þessvegna máli. Þar fyrir utan felur hvert atkvæði í sér skilaboð sem geta haft margskonar áhrif síðar, bæði á gengi flokkanna og stefnu þeirra í tilteknum málum, jafnvel þótt þinn flokkur nái engum manni inn í þetta sinn.
Atkvæðið þitt er ekki ónýtt þótt þú vinnir ekki kosningarnar. Það er hinsvegar ónýtt eða illa nýtt ef þú lætur þér standa á sama um það hverjir stjórna bænum þínum og landinu eða gefur villandi upplýsingar um afstöðu þína.
Mission accomplished
Þá er ég búin að sinna samkvæmisskyldum mínum fyrir næstu 5-6 árin.
Eldri kona spurði hvort ég væri dóttir afmælisbarnsins, (sem er rúmu ári eldri en ég). Ég sagði henni ekki að lesa Dale Carnegie betur, útskýrði ekki einu sinni að það þyrfti að vera um 10 ára aldursmunur til að þetta hallærislega mannblendnistrix hitti í mark. Brosti bara og sagði eitt orð, nei. Ég kann mig svo vel. Halda áfram að lesa
Rof
Hvað sjá menn svosem
við uppblásið rofabarð?
Fáein græn strá
í svörtum sandi
bera vitni
viðleitni mannanna
í eilífri baráttu við vinda sjó
og sand.
Ekki lái ég þér
að hugsa til framandi stranda.
Þar er ekki sandurinn auðnarland
heldur gylltur af sól og hlýr.
Þar hlaupa fallegar stúlkur
skríkjandi út með öldunni
og börn byggja kastala
í skuggi pálmatrjáa.
Þar er ekki krían
vomandi yfir,
tilbúin að gogga í þig
þegar minnst varir,
engir vindar blása sandi í augu þín
og ekki bera öldur þeirra stranda
lík barna þinna að landi.
Auðvitað ferðu þangað,
auðvitað.
Samt kemurðu aftur
og aftur
á hverju vori
með handfylli af grasfræi
í þeirri staðföstu von
að eitt þeirra skjóti rótum.
Síðsumar
Sjáðu vindinn bylgja hágresið.
Hvað býr í djúpum þess græna fljóts
sem engu fleytir?Sumarkvöld
svamlar máttvana
í grænum öldum grassins.
Nú er af því dregið,
hrekst fyrir vindum
og sekkur í djúp jarðar.
Þar sýgur það úr grasrótum
líf sitt og lit
að skila til moldar á ný
að liðnum vetri.