1. Pípmundur hinn góði náði með ódýrleik sínum að bræða kalið Mammonshjarta Spúnkhildar. Hjartahlýja Spúnkhildar í garð Pípmundar hins góða olli aftur umtalsverðri taugadrullu amlóða nokkurs sem virðist telja dyggðugri konu best sæmandi að láta sauma saman á sér langrifuna þegar ojminginn í lífi hennar tekur sálarfróun sjálfvalinnar eymdar fram yfir hana.

2. Eins og áður er fram komið tókust ekki ástir með Spúnkhildi og Pípmundi hinum góða þrátt fyrir að mér finnist að allar vinkonur mínar og systur eigi að giftast iðnaðarmönnum. Aftur á móti leit á tímabili út fyrir að kollegi hans, Píplaugur hinn kvenþreifni, teldi sig staddan í lukkupotti fremur en nornabæli.

3. Með ósleitilegri samvinnu tókst þeim félögum Pípmundi hinum góða, Píplaugi hinum kvenþreifna og Pípjóni hinum fagra að ljúka næstum því á einni viku því sem við Spúnkhildur héldum að yrði lokið á einum degi. Aukinheldur afrekuðu þeir að ganga þannig frá kjallaraglugganum að rotturnar komast að vísu ekki inn en eiga þó möguleika á svolítlu skjóli fyrir veðri og vindum.

4. Spúnkhildur hjúpaði djöflatertuna með hvítu ljósi og náði því þannig fram með fjölkynngi sinni að húsfundur samþykkti einróma að uppræta silfurskottur úr kjallara hússins.