Mínir blíðlyndu burðarjálkar, Sjarmaknippið hið eldra og Týndi hlekkurinn, eru í kaupstaðarferð. Þeir ætluðu að gista í nótt en létu svo ekkert sjá sig, sjálfsagt endað á fylliríi og kvennafari og er það vel. Vonir standa til að fóstursonur minn löggæsluhetjan flytji inn til mín um áramótin og vænti ég þess að ég sjái þá hina jálkana tvo og helst fríða sveit áhangenda mun oftar en síðustu árin.

Ég hef lengi haft hug á að kynna burðarjálkaþríeykið fyrir Böggmundi skáfrænda mínum. Þessir ljúfu drengir sem ég hef með eigin augum séð bera 300 lítra frystikistu og kippa henni troðfullri af kjöti, upp á flutningavagn, ættu ekki að láta sig muna um að gefa amlóða á borð við Böggmund áminningarskell á bossann og þótt hann sé flestum mönnum heimskari, hygg ég að hann átti sig allavega á því. Stór spurning hvort ég ætti ekki líka að taka löggæsluhetjuna (og helst hina tvo líka) með í heimsókn til Blíðu.

Böggmundur hefur engar áhyggjur af því að hans fyrrverandi geri alvöru úr því að leggja fram kæru vegna áreitni og hótana en það er hugsanlegt að sú lausa hrykki í skrúfganginn ef maður í búningi kæmi til dyra við annan mann og sennilega myndi hann annað hvort beygja af eða taka til fótanna ef Týndi hlekkurinn sæti svo í eldhúsinu, trommandi sallarólega á borðið með gríðarstórum fingurgómum og brosandi að hætti Jacks Nicholson. Mikið held ég að yrði þá skemmtileg upplifun að sjá svipinn á fíflinu honum frænda mínum, þeirri eymdarinnar töffaranefnu sem telur sig hafa umboð guðdómsins til að kvelja, brjóta niður og ráðskast með konu sem er þegar búin að henda honum út. Ég skil ekkert í Blíðu að vera ekki löngu búin að leggja fram formlega kæru en ég er ekki frá því að það væri bara sterkari leikur að kynna hann fyrir burðarjálkunum blíðlyndu. Sjálfsagt þætti þeim heldur ekkert leiðinlegt að leiða frænda minn í sannleika um staðsetninu ölkrár þeirrar er Davíð nokkur á að hafa sótt hvað stífast og best gæti ég trúað að góð stund með Böggmundi í kjölfarið, yrði til þess að auka ennfrekar á taumlausa kæti þessara kraftsælu ljúflinga.