Af og til lendi ég í ægilegri krísu yfir tenglastefnunni minni.

Tenglar á persónulegri vefsíðu geta nefnilega þjónað margvíslegum tilgangi. Þeir geta sagt eitthvað um eiganda síðunnar. T.d. hverja maður þekkir, hvað vekur áhuga manns og hverskonar vefbækur höfða til manns.

Þeir gefa þeim sem maður tengir á ákveðin skilaboð; ég tengi á þig, það merkir að mér líkar við þig janfvel þótt þú sért ekki spes penni, eða ég tengi á þig þótt ég þekki þig ekki, það merkir að mér finnst vefbókin þín áhugaverð.

Tengill þarf ekki endilega að merkja að maður lesi það sem er á bak við hann. Það skal enginn segja mér að fólk sem er með 70 tengla á síðunni sinni lesi svo mörg blogg reglulega. Tengill getur þannig verið tákn um vinsemd, ég tengi á þig og þú á mig, jafnvel þótt við lesum ekki hvort annars blogg, bara svona til merkis um að það fari nú samt vel á með okkur. Þeir geta haft auglýsingagildi; hér er athyglisverður pólitíkus/listamaður/fyrirtæki/hreyfing.

Gallinn er sá að ef tenglarnir eru of margir, ranna þeir saman í kraðak. Lesandinn missir sjónar á tilgangnum og þar með er tilgangurinn horfinn. Og ef maður vill sneiða hjá því að vera með 5 tengla sem skipta mann máli innan um 100 aðra sem eru ekki sérlega mikilvægir, þá þarf maður að taka ákvarðanir sem eru ekki eins auðveldar og ætla mætti. Vefbækur skipta sumt fólk mjög miklu máli og heiðarleiki og góðmennska fara ekki alltaf saman.

Hversu lengi á maður að halda tengli á vefbók sem er ekki uppfærð nema þrisvar á ári?
En hvað ef þær fáu færslur eru alger snilld?
Eða ef það er einhver sem maður elskar út af lífinu?

Hvað á maður að gera við bloggara sem manni þykir vænt um ef hann er svo slæmur penni að mann verkjar í heilann við lesturinn en er samt afar hrifinn af eigin skrifum? Væri maður ekki særa hann með því að taka tengilinn út?

Hvað gerir maður við tengil á blogg sem var einu sinni uppáhalds en er það ekki lengur?

Hvað gerir maður við tengil á bloggara sem er þrusugóður penni en skrifar eingöngu um eitthvað sem maður hefur engan áhuga á?

Hvað gerir maður ef maður á 10 uppáhaldsbloggara og 9 þeirra eru karlmenn?

Hvernig raðar maður tenglum? Í stafrófsröð? Eftir því hversu oft síðurnar eru uppfærðar? Eftir því hversu náið samband maður á við bloggarann? Eftir því hversu mikilar mætur maður hefur á hverri síðu?

Hvaða heiti gefur maður tenglunum. Á maður að nota nafn höfundar, dulnefni sem höfundur notar á netinu, titilinn á vefbókinni, vefslóðina, gælunafn sem maður býr til sjálfur?

Þetta er svona dæmi um lúxusvandamál. Ég held að ég reyni bara að njóta þess að hafa ekkert alvarlegra til að armæðast yfir.