Af öllu Ísalands samsafni heiladauðra fávita er rjóminn og ljóminn samankominn á vefnum einkamal.is

Þar getur t.a.m. að líta stóran flokk karla sem strax í fyrsta bréfi gefa upp nákvæm mál á lengd og umfangi besefa síns og má af því ráða hversu áhugaverður viðkomandi hlýtur að vera að öðru leyti.

Upp á síðkastið hef ég einnig fengið nokkuð mörg skeyti frá drengjum á aldrinum 17-22ja ára, sem hafa mikinn áhuga á eldri konum og virðast álíta að ekkert þrái „eldri kona“ heitar í lífinu en ungan fola sem hefur úthald til að andskotast á henni svo klukkutímum skiptir. Fylgir slíkum skeytum gjarnan ítarleg lýsing á klámmyndabrögðum ýmsum sem ekki væri sæmandi að hafa eftir á opinni vefsíðu. Sökum hins útbreidda kvilla er virðist þjaka stóran hluta þeirra sem nota vefinn og nefna má sértæka stafsetningarröskun er tæpast hægt að ætlast til þess að nokkur manneskja leggi það á sig að lesa allar auglýsingar frá þeim sem svara en til leiðbeiningar má geta þess að kyntröll á þessum aldri nota gjarna orð eins og hæbb, neibbs eða jebbs í fyrsta bréfi.

Skal nú tekið dæmi um netspjall mitt við dæmigerðan kvennljóma á einkamal.is. Tekið skal fram að notandanafn er uppspuni.

Trölli: Hvað seijist?
Eva: Þú meinar líklega segist?
Trölli: Ha segist, kað áttu við? Ertu gröð?
Eva: Ég hef bara engar upplýsingar í höndunum um staðlaða samræðisfýsn svo ég geri mér ekki nokkra grein fyrir eðlisgreddu minni samanborið við annað kvenfólk. Annars finnst mér dálítið frekt að hefja samtal á þessari spurningu.
Trölli: en núna, ertu gröð núna?
Eva: Ef ég væri gröð núna þá væri ég nú líklega að gera eitthvað í því og sæti þá varla við tölvuna. En þú, ert þú dóni að eðlisfari eða ertu bara svona heimskur?
Trölli: Neibbs, ég er ekkit heimskur en ég er graður -grrr.
Eva: Neibbs?!!! Drottinn minn dýri, hvað ertu eiginlega gamall?
Trölli: 18 ára. Hurru, ég hef áhuga á að próa eldri konu. Viltikki taka einn ungann í kennslu?
Eva: Ég get kennt þér stafsetningu. Þú mátt líka koma heim til mín og leika við krakkana mína í Play Station, kannski fáið þið sleikjó ef þið takið til eftir ykkur.
Trölli: Vá það væri gegt. Nei kommon flotta geðu séns, ég er með ógissla stóran.
Eva: Jæja vinur, það var gott að þú fékkst stóran sleikjó fyrir að taka til í herberginu þínu, þú ert áreiðanlega dugnaðardrengur og nú verð ég að fara út með ruslið. vertu sæll.
Trölli: Bídd aeins. viltu mig ekki?
Trölli: Ég get gert það 5 sinnum í röð.
Trölli: Hafðu samband. þú munt ekki sjá eftir því.