Greinasafn fyrir flokkinn: Allt efni

Silfur Egils fer nú að nálgast gull að verðgildi

Birt þann af

Óttalegur smásálarháttur finnst mér nú að nota umferðaróhapp unglings til að gera lítið úr málstað og mótmælaaðferðum heillar grasrótarhreyfingar.

Agli Helgasyni (og öðrum sem rakalaust hafa haldið því fram að meðlimir Saving Iceland viti ekki um hvað þeir eru að tala) til upplýsingar, þá voru gaskútarnir í bílnum ekki ætlaðir til hryðjuverkastarfsemi, heldur var þetta unga fólk að flytja útilegudótið sitt í bæinn. Þessar friðelskandi tófúætur nota gaskúta nefnilega til að elda en ekki til hernaðar.

Fyrir hönd unga vinar míns sem hefur nú verið handtekinn nógu oft til að hafa efni á þessari glæsikerru sem lenti á vegg hérna fyrir utan hjá mér í gær, biðst ég afsökunar á því að bíllinn skuli vera úr áli. Ég býst við að Egill Helgason kúki eins og annað fólk og myndi því aldrei voga sér að vera með einhver læti yfir því þótt íslensk stjórnvöld gæfu öðrum þjóðum leyfi til að nota árnar okkar sem losunarstöðvar fyrir mannasaur. Það myndi ég hinsvegar gera og kúka ég þó. Svona er nú hræsnin í þessum umhverfissinnum.

Bréf til RÚV

Birt þann af

Kæra RÚV

Mig langar í helling af peningum og varð því mjög glöð þegar fréttir bárust af því (samkvæmt áreiðanlegum heimildum) að meðlimir Saving Iceland fengju greitt fyrir að vera handteknir. Þar sem fréttastofa RÚV hefur aðgang að áreiðanlegri heimildamönnum en ég sjálf, og Óli aktivisti, Haukur sonur minn, Siggi pönk og Helga gamla anarkistaamma, harðneita öll að borga mér svo mikið sem krónu með gati, fer ég þess á leit að fréttastofa upplýsi mig um eftirfarandi atriði:

-Hvaða fjársterku aðilar útvega hreyfingunni fé til að borga mér?
-Hversu mikið ég fæ fyrir minn snúð?
-Er virðisaukaskattur innifallinn í þóknuninni eða leggst hann ofan á?
-Er þóknunin kannski ekki gefin upp til skatts?
-Er sami taxti fyrir alla eða hef ég möguleika á að hífa mig upp? (t.d. upp í krana)

Sú spurning sem brennur heitast á mér er þó þessi:
-Hvert ég á að senda reikninginn?

Um leið og ég fer fram á svör við þessum spurningum vil ég koma því að að samkvæmt heimildum sem ég tel áreiðanlegar, fá fréttamenn RÚV aukagreiðslur í formi kókaíns ef þeir ná að plata þjóðina með innistæðulausi bulli. Ég hef ekki í hyggju að færa nein rök fyrir þessari staðreynd en verði ég beðin um það mun ég standa við það sem ég segi.

 

Kannski …

Birt þann af

Það urðu mér ákaflega mikil vonbrigði að fá hvorki VG né Íslandshreyfinguna í ríkisstjórn. Ég hef löngum haft horn í síðu Samfylkingarinnar og treyst fáum þar á bæ en frá síðustu stjórnarmyndun hefur Össur vaxið mikið í áliti hjá mér. Mér sýnist á öllu að við séum loksins búin að fá iðnaðarráðherra með siðferðiskennd. Vonandi tekst honum að vinna þetta mál. Ef Össur heldur það út allt kjörtímabilið að taka tillit til náttúruverndarsjónarmiða, ætla ég að kjósa Samfylkinguna næst.

Vel heppnuð aðgerð

Birt þann af

Segið svo að beinar aðgerðir beri ekki árangur. Fyrirtækið varð fyrir fjárhagstjóni sem það mun aldrei fá bætt. Það er eitt af markmiðum beinna aðgerða. Annað markmið er að halda umræðunni lifandi og kann ég stórum hópi Moggbloggara bestu þakkir fyrir bullið í sér. Það sýnir bæði taugadrulluna sem grípur um sig og heldur umræðunni í gangi.

Einkar gáfuleg ákvörðun

Birt þann af

Það lítur út fyrir að Íslendingar muni af ráðsnilld sinni splæsa fríu fæði og húsnæði á meðlimi Saving Iceland.

Dettur einhverjum heilvita manni í hug að fólk sem er vant því að búa vikum saman í tjöldum og trjáhýsum, jafnvel yfir veturinn, komast stundum ekki í bað vikum saman og nærast á því sem er í boði hverju sinni, hversu óspennandi sem það er (ég veit t.d. að 5 daga í röð bauð anarkistaeldhúsið uppi í Mosfelssdal upp á kartöflurétt til að bjarga kartöflum sem lágu undir skemmdum og þau fengu ekki eina kvörtun), kippi sér eitthvað upp við að fá viku frí til að lesa pólitískar bókmenntir og kynna málstað sinn fyrir afbrotamönnum sem margir hverjir væru alsto tilbúnir til að beita aðferðum sem ganga mun lengra en aðgerðir hreyfingarinnar? Heldur einhver að þetta verði til þess að þau hætti baráttunni?

Ég þekki þennan unga jarðfræðing. Ég hef aldrei séð hana verklausa nema rétt á meðan hún er að lesa sér til um jarðfræði Íslands og áætlanir Landsvirkjunnar. Ég spái því að hún nýti þessa átta daga til að lesa og skrifa við mun þægilegri aðstæður en hún hefur haft síðustu mánuði.