Yndið mitt

Öllum konum finnst gaman að heyra að þær séu sexý. Hvort sem það stenst eður ei. Ég veit að ég get litið þokkalega út í þröngum gallabuxum og finnst það gaman. Hitt get ég sagt þér að æskudýrkun á sér mjög svo rökréttar skýringar. Konur verða alveg jafn ógeðslegar með aldrinum og karlar. Lærin á mér minna á Hraun í Öxnadal og þótt ég sé ekki stór, hefur Málarinn stórkostlegt vinnurými á bringunni á mér og næstum niður að mitti án þess að mjólkurkirtalbungurnar séu að þvælast fyrir.

Svo skjallaðu mig ef þú hefur gaman af því en vertu ekki svo vitlaus að trúa á það sem þú sérð. Yfirleitt eru hlutirnir nákvæmlega eins og þeir virðast vera en þar sem sjeiköpp og pússöpp koma við sögu ásamt vænum slurk af meiki og maskara er betra fyrir ungan mann að fara hægt í sakirnar. Morkinskinnur fara auðveldlega úr böndunum ef þeim er óvarlega flett.