Greinasafn fyrir merki: umræðan

Viltu hafa rasista á Íslandi?

Birt þann af

Í tilefni af þessum pistli:

Hvað er pláss fyrir marga rasista á landinu,  100, 1000, 10.000 eða kannski fleiri?  Meðan landrými leyfir hugsa einhverjir en hvað með okkur hina sem finnst bara ágætt að vera laus við ykkur. Hingað til hef ég ekki talið mig umburðarlynda gagnvart fávitum en mér finnst óþægilegt að sjá hversu hratt þeim fjölgar á Íslandi.

Ég á ekki í vandræðum með venjulega heimskingja en það er eitthvað við þessa miklu fjölgun ógeðfelldra kynþáttahatara sem fer í taugarnar á mér.  Þeir falla ekki eins vel í umhverfið og hinir bjánarnir.  Þeir minna mig meira á “rasistavandamálið” sem Íslendingar vilja helst ekki horfast í augu við.

Það þarf nefnilega að stýra því hverskonar fólk fær að vaða uppi á landinu.  Sú aðferð sem stjórnvöld nota í dag er að mínu mati meingölluð. Ótakmarkaður málfrelsi skíthæla sem telja sig öðru fólki æðra. Meðan t.d. vinnandi asíufólk og fólk utan Evrópu er upp á náð og miskun kerfisins komið eða háð duttlungum Alþingis.

Íslendingar þurfa að svara því hversu marga fávita þeir vilja hafa í landinu og hvernig fólk.  Það er ekki hægt að treysta á legu landsins og veðurfar.  Sú vörn virðist a.m.k. ekki virka lengur.  Þó ég nefni drullusokka eins og þig hér að ofan þá hef ég ekkert á móti heimsku fólki.  Ég vil bara hafa takmarkaðan fjölda af fávitum með fasta búsetu í landinu.

Hvar sú tala liggur er síðan eitthvað sem þarf að ræða opinberlega.

 

Aldrei segja ekki

Birt þann af

Í dag frétti ég að það bæri vott um neikvæðan hugsunarhátt að segja ‘ég á ekki í vandræðum með að halda áætlun’ þar sem bæði orðin ‘ekki’ og ‘vandræði’ koma fyrir. Jákvæðara væri að segja ‘Ég get vel haldið áætlun’.

Voðalega leiðist mér svona rétthugsun.

https://www.facebook.com/eva.hauksdottir.norn.is/posts/133972259992645

Jóladólgurinn

Birt þann af

Jóladólgurinn er kominn af stað. Hvort sem þú hefur áhuga á jólageðveikinni eða ekki, skaltu hlaða öllu hugsanlegu Facebook jólablingblingi með hjörtum, glimmer og jólasveinum inn á veggi vina þinna, ásamt sykurklístruðum stöðulínum sem þú afritar frá einhverjum sem kann fleiri smákökuuppskriftir en stafsetningarreglur. Athugaðu að það hversu margir dólgast í þér á móti er óbriðgull mælikvarði á manngildi þitt.

Að gefnu tilefni árétta ég að ég set ekkert samasemmerki milli stafsetningar og manngildis. Ég set hinsvegar samasemmerki milli heimsku og þess að afrita hvaða vitleysu sem er frá öðrum, án þess að hugsa einu sinni út í það hvað maður er að gera. Ég hef séð copy-paste texta, fullan af málvillum og með stafsetningu sem nýbúi myndi skammast sín fyrir, hjá fólki sem er alveg þokkalega máli farið og ætti að hafa forsendur til að leiðrétta það. Skítt með það, fólk má pönkast eins og það vill á sínum eigin vefsíðum en það er orðið dálítið dólgslegt að skrifa t.d. ‘kóperaðu þetta og settu í statusinn þinn og sendu mér til baka ef þú elskar barnið þitt’ undir flórsykurhúðaða væmnina og klína þessum hroða inn á veggi annarra.

Það er hægt að draga úr þessu með því að sniðganga það. Ég fékk hroðalegan helling af svona glimmeri í hittifyrra, heldur minna síðasta ár enda sendi ég aldrei neitt til baka og hendi svona application dóti út nema það sé til styrktar einhverju góðu málefni.

Arnþrúður drullar yfir hlustanda

Birt þann af

Jæja. Hún Arnþrúður Karlsdóttir fer nú líklega að verða búin með umburðarlyndiskvóta landans gagnvark kynþáttahyggju og dónaskap.

Hvort sem konan skildi Arnþrúði eða ekki (og það er alls ekki augljóst að hún hafi skilið allt sem hún sagði) er nokkuð augljóst að hún er ekki fær um að tjá sig á íslensku. Það er óheyrilegur dónaskapur að tala svona við fólk opinberlega og gefa því ekki færi á að svara fyrir sig.

Það er allt í lagi að útvarpsstöð haldi þeirri stefnu að þar sé töluð íslenska og ef menn vilji tjá sig á öðrum tungumálum skuli það túlkað á íslensku jafnóðum. Hinsvegar er ekkert sem réttlætir þennan dónaskap. Hún lét sér það ekki nægja heldur spyr hún með skætingi hvort það hafi ekkert gengið hjá henni að læra íslensku. Þetta er óþarfi og dónaskapur í þokkabót.

Arnþrúður gat vel útskýrt kurteislega og vingjarnlega fyrir konunni (helst á ensku) að það væri ekki í boði að tala önnur tungumál í þessum þætti. Það hefði svo verið snjallt hjá henni að bjóða konunni að hringja utan útsendingartíma og bera upp erindið, sem Arnþrúður hefði svo getað komið til skila í næsta þætti.

 

 

Umræðan snýst annarsvegar um það hvort sé í lagi að sýna fólki dónaskap fyrir að kunna ekki íslensku, hinsvegar um það hvort það sé réttmæt krafa að útvarpsþáttur fari eingöngu fram á íslensku. Ég hef enn ekki séð neinn krefjast þess að fólk fái að tala ensku í spjallþáttum, heldur er það kynþáttahygga Arnþrúðar sem oft hefur komið fram en skín sérlega vel í gegnum dónaskap hennar í garð þessarar konu, sem fólk er ósátt við.

Segðu mér annars, í hvaða löndum er þess krafist að fólk þurfi að læra málið ef það á að fá að búa í landinu og hver metur hvenær fólk er orðið nógu vel talandi til þess að fá að vera?

Annars vitum við ekki einu sinni hvort þessi manneskja sem hringdi inn býr á landinu eða ekki. Það er alveg hugsanlegt að hún sé bara í heimsókn. Ég er líka ansi hrædd um að ef það hefði verið einhver frægur sem hringdi inn og talaði ensku, þá hefði hann/hún fengið annað viðmót.

Stjórnlagaþingsframbjóðandi um aðskilnað ríkis og kirkju

Birt þann af

Jóhanna Heiðdal Sigurðardóttir, frambjóðandi til Stjórnlagaþings, vill hafa hina evangelísk- lúthersku kirkju sem Þjóðkirkju. Hún vill ekki aðskilja ríki og kirkju, því hún vill geta haldið jól og páska og að fólk eigi þess kost að láta skíra börn og ferma.

Þetta er skarplega athugað hjá Jóhönnu. Í öðrum löndum þar sem ríki og kirkja eru aðskilin eru engin jól eða páskar og ekki eru börn skírð og fermd. Við þetta má bæta að jarðarfarir voru lagðar niður um leið og skírnir og fermingjar, páska og jól, í þeim ríkjum sem hafa aðskilið ríki og kirkju.

Í Þýskalandi er ástandið svo slæmt að þar hefur enginn verið jarðaður síðan 1918. Enda er lyktin orðin svakaleg.

Uppfært:
Tengillinn hér að ofan tengir ekki lengur á stefnu Jóhönnu en hér má lesa fulla tilvitnun.