Saltkjöt er bráðdrepandi.
Grillmatur er krabbameinsvaldandi.
Rauðar M&M kúlur líka.
Kleinur valda kransæðastíflu.
Og kokteilsósa.
Kaffi veikir ónæmiskerfið.
Sykur veldur offitu, geðveiki og sykursýki.
Aspartam er gríðarlega hættulegt.
Líka MSG.
Og nú Tófú.
Ég held ég sé að ná þessu. Fólk deyr af völdum fæðu. Hver munnbiti sem þú kyngir, færir þig nær sjúkdómum og dauða.
Eftir nokkrar mínútur hefst merkilegur dagur. Réttur þeirra sem þola ekki tóbaksreyk til að sækja veitingastaði hefur verið viðurkenndur. Reyndar hefði ég viljað að mannréttindi barna til reyklauss heimilis hefðu fyrst verið tryggð. Börn hafa náttúrulega ekki kosningarétt svo sjálfhverfir foreldrar fá líklega að níðast á öndunafærum þeirra án afskipta ríkisvaldsins þar til einhver fanatíkusinn sem ekki gúterar rétt foreldra til að eitra fyrir börnum sínum gerir það sem best virkar; að verða bara gjörsamlega brjálaður.
Mér skilst að Kormákur og Skjöldur ætli að benda á Siv (líklega nokkuð snúðiglega) ef nágrannar kvarta undan hávaða frá tóbaksfíklum sem svala fíkn sinni á götum úti. Sennilega er þetta þarfasta verkið sem sú lufsa hefur unnið í sinni ráðherratíð svo ég vona nú að fáir gerist svo vitlausir að telja hana ábyrga fyrir skrílslátum einhverra fíkla. Ég kann gott ráð við nágrannakvörtunum; göngum bara skrefinu lengra og bönnum þennan viðbjóð á almannafæri.
Djöfull finnst mér það skítt þegar öll geðræn vandamál eru notuð sem rök gegn sjálfstæðri hugsun . Nú þekki ég ekki ástandið á Jóhannesi Kjarval síðustu mánuðina sem hann lifði svo ég ætla ekki að dæma um akkúrat þetta mál en rökin sem koma fram í þessari frétt þykja mér veik. Geðveiki er ekkert endilega sönnun þess að maður sé ekki fær um að ákveða hvað hann gerir við eigur sínar, ekki frekar en elli. Sjálfsagt getur geðveiki stundum haft þau áhrif, rétt eins og líkamleg veikindi geta í sumum tilvikum gert fólk ósjálfbjarga en geðsjúkdómar eru af ýmsum toga og það er ekki samasemmerki milli geðveiki og þess að vita ekki hvað maður er að gera.
Ef út í það er farið er enginn fullkomlega heilbrigður.
Ég er að hugsa um að setja á markað vítamínbætt súkkulaði. Auglýsingin gæti hljóðað svo:
Hollur morgunverður er nauðsynlegur í leik og starfi. Gefið börnunum bragðgóðan morgunverð. Vítasukk, næringarríkasta morgunsúkkulaði á markaðnum.
Svo má bæta um betur með karamellukvöldverði. Endanlegt markmið er að tryggja að aldrei fari neitt sem ekki inniheldur hvítan sykur og harða fitu í gegnum metlingarveg barna.
Greinilegt að mikil framsýni ríkir í Páfagarði.
Mér þykir nú vænt um að páfi skuli með visku sinni og aðstoð heilags anda, ætla að finna út hvað skuli til ráða ef annað hjóna greinist með HIV. Það hlýtur að vera heppilegri lausn en að koma í veg fyrir smit með fulltingi smokksins. Páfi hefur hingað til lagt blátt bann við notkun smokksins. Mér hefur skilist að það bann hafi ekkert komið hans eigin duttlungum við, heldur hafi hann þvert á móti komist að þeirri niðurstöðu, fyrir tilstilli visku sinnar og leiðsagnar heilags anda, að smokkurinn sé verkfæri Satans. Ætli guðdómurinn sé eitthvað að velta fyrir sér möguleikanum á þvíað skipta um skoðun eða er viska hans Heilagleika kannski ekki óskeikul?