Frá píslargöngu LÍÚ
Regnbogabörn og ömmur þeirra hafa lýst yfir samúð sinni með LÍÚ en sem kunnugt er hefur sambandið sætt miklu einelti af hálfu almennings um langt árabil. Halda áfram að lesa
Regnbogabörn baka handa LÍÚ
Greinasafn eftir:
Málfarsúrræði
Nýyrðasmíð er áhugaverð, skemmtileg, góð. Nýir tímar kalla á ný orð og það er gaman að auðga málið með góðum nýyrðum, vel heppnuðum tökuorðum og endurvinnslu á úreltum orðum.
Það gladdi því viðkvæma málkennd mína þegar ég sá hið dásamlega orð langtímabúsetuúrræði, notað í frétt um aðstæður heimilislausra. Hversvegna að nota jafn fábreyttan orðaforða og húsnæði, dvalarstaður, híbýli, vistarvera, heimili, skjólshús, bústaður, íverustaður, gististaður og athvarf, þegar mögulegt er að nota hið stórkostlega vanmetna orð úrræði?
Ég legg til að sett verði á laggirnar svokölluð úrræðanefnd og verði hlutverk hennar að finna og útbreiða ýmis málfarsúrræði með áherslu á lausnir annarsvegar og úrræði hinsvegar. Úrræðanefnd gæti lagfært ýmsar ambögur og sett úrræðalausnir í staðinn. Greiðslufrestur yrði þannig frestunarúrræði, fæðingar yrðu barneignalausnir, brandari yrði spaugsemisúrræði og brauðrist yrði ristabrauðslausn.
Helst þyrfti úrræðanefnd að bjóða upp á heildrænar máfarslausnir með heildstæðum nýyrðaúrræðum.
Einar í forsetaframboð
„Ég hef lengi átt mér þann draum að auka siðgæði þjóðarinnar“ segir Einar Sauðkrók, sem tilkynnti framboð sitt til forsetaembættis í dag. Einar er sem kunnugt er hættur í Vítisenglum og hyggur nú á frama á öðrum vettvangi.
Helstu markmiðin sem Einar mun vinna að í valdatíð sinni eru að uppræta vímuefni, klám og þágufallssýki að ógleymdri skipulagðri glæpastarfsemi og annarri framsóknarmennsku.
„Það er náttúrulega þessi skipulagða glæpastarfsemi sem er mesta vandamálið. Ég vil bara banna hana alfarið. Ég hef reynslu af þessu sjálfur og get staðfest að þetta er bara tómt rugl, það er miklu meira upp úr óskipulagðri glæpastarfsemi að hafa. Og svo er það náttúrulega klámvæðingin, mér skilst að þeir séu enn að selja Cockburns í ríkinu, það þarf sterkan leiðtoga til að takast á við slíkan ósóma á krepputímum“ segir Einar.
Þess má geta að Einar tapaði í lottóinu á dögunum og er talið víst að það sé ríkisstjórinni að kenna.
Englakórinn hefur lýst yfir stuðningi við framboðið og vinnur nú að útgáfu geisladisks því til styrktar. Meðal laga á disknum er hinn klassíski sumarsmellur Skín við sólu Skagafjörður, en Einar er einmitt ættaður að norðan.
Klámsjúkir múslímar á mótorhjólum
Ofbeldi eykst og eykst og eykst. Sérstaklega kynferðisofbeldi. Menn greinir reyndar á um hvort það sé mótorhjólaklúbbum, klámvæðingunni eða muslimum að kenna en aukningin er staðreynd, heimur versnandi fer og æskunni hnignar. Halda áfram að lesa
Ofurstirni skeit næstum á sig
Ofurstirni segir frá því á fésbókarsíðu sinni í dag að því hafi orðið brátt í brók eftir röð einkennilegra óhappa sem víst má telja að séu runnin undan rifjum ríkisstjórnarinnar.
Ekkert smá súrt sem gerðist fyrir mig í gær. Ég fór út í sjoppu til að kaupa happaþrennu. Á leiðinni yfir götuna var næstum keyrt mig niður. Þegar ég kom heim, fattaði ég að ég hafði læst mig úti. Það eru sko tvær dyr á húsinu og ég ætlaði að gá hvort dyrin fyrir bak við hús var hægt að opna. Það var líka læst en mér tókst að skríða inn um rúðuna. Þá fattaði ég að ég var búinn að fá magapest með 39 kommu hita en sem betur fer komst ég á hásætið áður en það varð stórslys.
Kókópöffssmyglarar gripnir glóðvolgir
Klámvarnardeild lögreglunnar á Tálkafirði kom upp um stórfellt smygl á ólöglegu kókópöffsi á 8. tímanum í gærkvöld. Það var klámvæðingarklúbbur 6. bekkjar grunnskólans á staðnum, Andsetnir englar sem stóð að smyglinu.
„Þetta er náttúrulega bara stjórnlaust. Hreinlega gersneytt öllum þráa eftir langvarandi neyslu efnisins, en á meðan við fáum ekki forvirkar rannsóknarheimildir, getum við lítið gert annað en að handtaka þá, lemja þá og stinga þeim í steininn“ sagði ráðskona klámvarnardeildar lögreglunnar í samtali við Pistliinn. Baddi búmm, talsmaður Andsetnu englanna hafnar ásökunum lögreglunnar með öllu. „Við ætluðum bara að fá okkur eitthvað gott í gogginn og þar sem klámvæðingarfrostpinnarnir voru farnir að þrána, vildum við frekar kókópöffs.“
Starfsemi skipulagðra glæpasamtaka færist í vöxt á Íslandi. Sem kunnugt er eru nú á bilinu 11,0- 11,09 ofbeldisklúbbar starfandi á landinu, þar af 0,7 á Tálknafirði. Talið er að allt að fimm meðlimir tilheyri hverjum þeirra og sumir jafnvel fleiri en einum samtökum í senn. Helstu viðfangsefni gengjanna eru skipulagning grímudansleikja og dreifing ólöglegs kókópöffs.
Víst er talið að hið þráaverjandi morgunkorn, kókópöffs, eigi uppruna sinn hjá Satni sjálfum. Á uppvaxtartíma kaldastríðskynslóðarinnar voru kúlurnar hrímaðar með hvítu efni og í kjölfarið upphófst mikið pönk og ofbeldismenning sem aldrei hafði áður þekktst í hinum vestræna heimi. Hvíta efnið var bannað snemma á níunda áratugnum en kúlurnar sjálfar voru þó áfram löglegar og ekkert lát varð á pönkinu. Leiddi viðstöðulaust kókópöffsát pönkaranna á endanum til svokallaðra kúlulána sem áttu stóran þátt í efnahagshruninu.
Líklegt er talið að þessi andsetni engill hafi ætlað að nota kókópöffsið við afbrigðilegar klámathafnir en eins og sjá má á myndinni er hann grímuklæddur og skekur í óþráavörðum ofstopa sínum hið þríeina reðurtákn; merki feðraveldisins, klámvæðingarinnar og markaðsaflanna.
Hvað sagði Hulda Elsa?
Ég þoli ekki kjaftasögur. Þ.e.a.s. þegar um er að ræða sögur sem koma almenningi við, þá þoli ég ekki að fá það ekki á hreint hvort er einhver fótur fyrir þeim og hver hann er þá.
Nú gengur saga um að Hulda Elsa Björgvinsdóttir, hafi verið að tjá sig um nauðgunarákæru á hendur Agli Einarssyni og unnustu hans, í kennslu í HR.
Ég er sannarlega enginn aðdáandi ríkissaksóknara og tilbúin til að trúa öllu illu upp á það embætti en þetta er fjandinn hafi það of seigur biti til að hægt sé að kyngja honum hráum. Vill einhver sem var í þessum tíma vessgú segja okkur hvaða smáfjöður varð að fimm hænum í þessu tilviki?