Það gengur náttúrulega ekki að löggan þurfi að lemja þunglyndið úr fólki. Biðjum Norðmenn um hríðskotabyssur strax svo þeir geti bara skotið þá sem eru með svona vesen.

Nú ætti öllum að vera ljóst að hvorki lögreglunni né innanríkisráðuneytinu er treystandi fyrir trúnaðargögnum. Löggan búin að skjóta geðsjúkan mann til bana og ekki hafa kollegar þeirra á Ísafirði lært meira af því en svo að þeir beita einmitt piparúða og skotvopnum þegar þeir lenda í því að þurfa að kljást við mann með geðkvilla. Hvað ætli þurfi meira til þess að þingmenn átti sig á nauðsyn þess að taka upp ytra eftirlit með lögreglunni? Ekki innra heldur einhverja stofnun eða embætti í stíl við Umboðsmann Alþingis. Einhvern sem getur kallað eftir öllum gögnum um þau mál sem ástæða er til að rannsaka.

Löggan er gegnrotin stofnun og núverandi lögreglustjóri á höfuðborgarsvæðinu ráðinn án auglýsingar. Ef hún hefur á annað borð látið þá sem rannsökuðu málið vita af samskiptum þeirra Gísla Freys þá hefur löggan ekki gert meira með það en svo að það kom ekki fram fyrr en eftir að hann játaði.

Og nei elskurnar, það er ekki eftirsjá að ráðherra sem
a) skilur ekki alvarleika þess að stjórnsýslustofnanir misnoti persónuupplýsingar og brjóti gegn trúnaðarskyldu,
b) lýgur blákalt að þinginu og fjölmiðlum,
c) skiptir sér af lögreglurannsókn (hvað þá rannsókn á eigin ráðuneyti) og
d) viðurkennir engin mistök nema með almennum yfirlýsingum á borð við þá að allir geri mistök. 
Það er þvert á móti alveg skelfilegt að hafa slíkt fólk í embætti.