Greinasafn fyrir merki: Búsáhaldabyltingin

Hversvegna að hylja andlit sitt?

Birt þann af

Jón Kjartan spyr hversvegna sumir anarkistar hylji andlit sín við mótmælaaðgerðir eða þegar þeir komi fram sem forsvarsmenn aðgerða.

Aðal hugmyndin á bak við það að hylja andlit sitt sú að draga úr líkunum á því að tiltekin andlit séu tengd við ákveðna hugmyndafræði eða ákveðnar aðgerðir eða jafnvel að fólk fái meiri áhuga á einstaklingnum en því sem hann er að berjast fyrir. Hver mannsbarn þekkir t.d. andlit Che Guevara, hins vegar eru mun færri sem þekkja þá hugmyndafræði sem hann aðhylltist. Einnig er hætta á því að þegar ákveðið fólk verður áberandi í starfi grasrótarheyfinga þá dæmi almenningur allt sem sú hreyfing gerir og segir út frá fáum einstaklingum. Þannig býður ‘andlit byltingarinnar’ bæði upp á fordóma gagnvart heilli hreyfingu og einnig persónudýrkun, en fátt er anarkistum verr að skapi.

Ég skil þessi sjónarmið og virði þau enda þótt ég hafi litla trú á að andlitsleysið virki. Ég held að fólk muni alltaf finna andlit á skoðanir og aðgerðir.

Önnur ástæða til að fela andlit sitt er sú að fólk getur lent í vandræðum eða minni háttar böggi þegar það tekur þátt í beinum aðgerðum sem geta verið á gráu svæði gagnvart lögum. Það er auðveldara að hindra aðgerðir ef fylgst er náið með ákveðnu fólki og lögreglan á það til að angra þekkt fólk eða jafnvel handtaka það án góðrar ástæðu. Þessvegna getur verið sterkur leikur að allir sem taka þátt í aðgerðinni séu illþekkjanlegir.

Bull

Birt þann af
mbl.is Fráleitt ólögmæt handtaka

Nei þetta var ekki lögmæt handtaka. Það er heimild fyrir því í lögum að handtaka fólk ef það hefur ekki sinnt boðun í afplánun. Hann SINNTI þeirri boðun árið 2007 en var hent út á 5. degi. Það er ekkert í lögum sem heimilar að fólk sem þegar hefur hafið afplánun sé hirt upp fyrirvaralaust. Hann hefur enga boðun fengið út af þessu máli síðan. Halda áfram að lesa →

Þegar mótmæli fara úr böndnunum

Birt þann af

Mótmælafundurinn á Austurvelli í gær var friðsamlegur. Fólk er að vísu orðið bæði langþreytt og langreitt og sú frábæra ræðukona Katrín Oddsdóttir tilkynnti ráðamönnum að ef ekki yrði boðað til kosninga fljótlega, myndi lýðurinn sjálfur sjá um að bera menn út úr opinberum byggingum. Enginn var þó borinn út í þetta sinn og þótt reiðin kraumi líkt og eldfjall sem býst til að gjósa, var allt var með hinni mestu spekt.

Halda áfram að lesa →

Haukur tekinn úr umferð -valdníðsla í verki

Birt þann af

Haukur var handtekinn í kvöld og honum gert að afplána 14 daga fangavist. Forsaga málsins er sú að í desember 2005 fékk Haukur á sig sektardóm vegna aðgerðar á vegum Saving Iceland. Hann kaus vitanlega að sitja af sér dóminn, þ.e. 18 daga, en var sparkað út á 5. degi til að rýma til fyrir öðrum aktivista sem þurfti að taka úr umferð. Honum var þá sagt að hann yrði kallaður inn síðar þegar fangelsismálastofnun hentaði. Hann reiknaði þó ekki með að vera hirtur upp af götunni án nokkurs fyrirvara.

Ragnar Aðalsteinsson hæstaréttarlögmaður þekkir þess ekkert dæmi að fangelsisyfirvöld skipti afplánun niður að eigin geðþótta. Það þarf mjög góðar ástæður til og einu dæmin sem þekkjast um að svo stuttum dómi sé skipt er ef sá dæmdi fer sjálfur fram á það vegna sérstakra aðstæðna, t.d. ef ástvinur fellur frá. Auk þess ber fangelsisyfirvöldum að boða fólk í afplánun með minnst 3ja vikna fyrirvara.

Ég tel engum vafa undirorpið að þessi óvenjulegu vinnubrögð, sem eru skýlaust mannréttindabrot, standa í beinu samhengi við það hve mikla athygli baráttuaðferðir Hauks hafa vakið. Tímasetningin er engin tilviljun. Undanfarna laugardaga hafa aðgerðasinnar staðið fyrir táknrænum gjörningum sem eftir er tekið og fá þeir skýr skilaboð um að betra sé að halda sig á mottunni, ganga ekki lengra en að halda ræðu eða veifa spjaldi.

Það er óþolandi að valdníðslan sem Íslendingar búa við skuli jafnvel ná til tjáningarfrelsins. Því er ætlunin að halda upp að lögreglustöðinni á Hverfisgötu strax að loknum mótmælafundi á Austurvelli á morgun og mótmæla þessum vinnubrögðum.

Mætum öll, fyrst á Austurvöll og svo upp að Hverfissteini. Höfum hátt og sýnum valdhöfum fram á að ekki verði þaggað niður í okkur með valdníðslu.

Hættum að borga

Birt þann af

Ég er hætt að borga af húsnæðisláninu mínu og ég hvet aðra til þess sama. Jú, það er áhætta en ég trúi því að nú sé almenningur búinn að fá nóg af þeirri okurvaxtastefnu sem viðgengst hér og sé tilbúinn til að grípa til aðgerða.

Breið samstaða um að hætta að borga af lánum hjá ríki og bönkum verður öflug mótmælaaðgerð, án nokkurrar hættu á meiðslum, eignatjóni eða handtökum. Allsherjar greiðslustræk myndi valda svo miklum vandræðum að það ætti að sannfæra þessa heyrnarlausu ríkisstjórn um að við sættum okkur ekki við að nokkrir leynimakkarar ákveði einhliða að almennir borgarar taki að sér að greiða skuldir sem þeir hafa ekki ábyrgst. Fáir Íslendingar eiga skuldlaust húsnæði og þeir sem eiga það eru flestir með einhverjar aðrar skuldir í bönkum. Það er hægt að kúga einstaklinga, en það er ekki hægt að bera 300.000 manns út af heimilum sínum og gera meirihluta þjóðarinnar gjaldþrota.

Hættum að borga og krefjumst þess að verðtrygging verði afnumin. Krefjumst þess að í stað þess að grafa undan láglaunafólki, verði laun bankastjóra og ráðherra lækkuð verulega, þingmönnum fækkað og kjör þeirra skert, sendiráð víðast hvar lögð niður, allt bruðl-að-geðþótta-ráðherra-fé tekið af ráðuneytum og allt sem kallast risna á vegum hins opinbera afnumið. Við getum náð fram hverju sem samstaða næst um, bara með því að hætta að borga. Ef næst breið samstaða gæti jafnvel einn mánuður dugað.

Hvort sem við erum í fjárhagsvandræðum eða ekki, stöndum saman um að senda ráðamönnum skilaboð sem þeir skilja, með því að sjá til þess að þann 1. desember fari eins lítið fé inn í bankakerfið og ríkiskassann og mögulegt er. Hættum að borga.