Vinkona mín komst að því fyrir tilviljun að einhver hefur nógu mikinn áhuga á fjárhagsstöðu minni, til að kynna sér mánaðarlega hvort ég sé á vanskilaskrá eða með einhver opinber gjöld ógreidd. Ósköp krúttlegt að vita til þess að einhver óviðkomandi beri slíka umhyggju fyrir mér að það sé hluti af rútínunni að tékka á því hvort ég sé nokkuð í vandræðum. Ég hef enga trú á að það sé einhver heildsalanna minna sem stendur í þessu reglubundna snuðri því á það samstarf hefur engan skugga borið. Ég versla fyrir hámark 80.000 í hvert sinn, oftast mun lægri fjárhæðir, og staðgreiði oftar en ekki, fæ líka alltaf skjóta og góða þjónustu.

Eitt hint til þessa velunnara míns (því nafn á vanskilaskrá segir þér ekkert annað en að sá svartlistaði sé löngu búinn að missa niður um sig); ef þú hefur svona mikinn áhuga á því hvernig mér gengur, væri einfalt mál að hringja í þá sem ég á regluleg viðskipti við, kynna þig sem Jónu Jóns eða Guðmund Gunnarsson og segjast vera að taka við bókhaldinu fyrir mig. Væri mjög sannfærandi að segja í mæðutón að þetta virðist nú hafa verið „óttalegt rassvasabókhald hja henni blessaðri“ og biðja svo um nákvæmar tölur um skuldastöðuna.

Trúið mér, þetta virkar hvort sem um er að ræða mín persónulegu fjármál eða fjárhagsstöðu Nornabúðarveldisins. Hver sem er getur fengið allar upplýsingar um skuldastöðu óviðkomandi fyrirtækja og einstaklinga. Það er sama hvort hringt er í skattinn, orkuveituna eða einhver þeirra smáfyrirtækja sem útvega mér jurtir, kerti og reykelsi, fólk mun gleypa þetta hrátt og gefa þér nákvæma tölu. Í öllum tilvikum mun sú tala vera kr 0 en sumir munu geta þess að reyndar sé líka búið að greiða fyrir síðustu sendingu jafnvel þótt reikningurinn hafi ekki ennþá verið sendur.

Nei krúsidúlla, ég er ekkert á leiðinni á vanskilaskrá.
Ég er bara ekki svoleiðis týpa.
Ég býst við að þetta séu vonbrigði en því miður dettur mér ekkert annað í hug til að gleðja þig með.