Í fyrri viku var ungum konum kennt að umgangast flagara. Til eru fleiri tegundir kvennabósa en flagarinn en munurinn er sá að flagarinn er auðþekkjanlegur. Til þess að bera kennsl á aðrar gerðir kvennabósa þarf stúlkan fyrst að kynnast þeim dálítið. Því er góð regla, þegar þér verðið ástfangnar, að eiga nokkur stefnumót við piltinn áður en þér kynnið hann sem unnusta yðar. Þannig getið þér gengið úr skugga um að hann sé sannarlega vænn maður.

Ef þér hafið hug á að eiga stefnumót við mann sem sýnir yður litla athygli, getið  þér e.t.v. vakið áhuga hans með því að brosa flírulega, læka hvert einasta innlegg hans á fésbókinni, sækja sömu námskeið og hann ef þið eruð bæði námsmenn og reyna að verða sem oftast á vegi hans. Þó má ætla að það skili enn betri árangri að ganga hreint til verks og bjóða honum út enda hafa úreltar staðalmyndir kynjanna nú verið með öllu aflagðar. Reyndar hefur það ótvíræðan kost að þér takið sjálfar af skarið því ef pilturinn tekur boði yðar fálega er líklegasta skýringin sú að hann sé svokölluð pungfýla sem ekki hefur gengist við afnámi kynjaímynda og hefur engan áhuga á yður nema þá til að hlutgera yður.

Annar augljós kostur við að bjóða manninum út sjálfar er sá að þér lendið þá ekki í neinni óvissuferð. Ævintýri geta vissulega verið spennandi en á fyrsta stefnumóti er heppilegra að þér skipuleggið dagskrána sjálfar. Annars gætuð þér t.d. lent í þeirri vandræðalegu aðstöðu að þurfa að fara á japanskan sushi-stað þar sem hvorki hnífapör né remólaði eru í boði.

Þegar tískan er jafn fjölbreytt og raun ber vitni getur ung kona talið að auðvelt sé að velja viðeigandi fatnað. Ef þér eruð ekki vissar um hvort tiltekin flík fari yður vel er þó öruggast að velja litla svarta kjólinn. Og nú kunnið þér að telja að hið sama eigi þá við um litlu, svörtu nærbuxurnar. En þar eruð þér á villigötum.

Setjum sem svo að kavaléri hafi boðið yður að snæða með sér kvöldverð á veitingahúsi. Þér eruð geislandi fagrar í litla svarta kjólnum en hvað ef hann býður yður nú í skemmtigöngu umhverfis tjörnina eftir matinn? Þá gæti farið svo að nærhaldið þokist upp og skerist inn á milli íturvaxinna þjóhnappa yðar með tilheyrandi óþægindum. Hætt er við að það skerði yndisþokka yðar ef þér þurfið í fimmta hverju skrefi að að teygja höndina aftur fyrir yður til þess að hagræða nærhaldinu og þótt það sé engan veginn skylda stúlkunnar að ganga í augu karlmanns má vera að þér, sem frjáls kona, kjósið það fremur.

Af þessum sökum er rétt að vanda valið á nærfatnaði. Ef þér hafið vanist því að nota þríhyrndan taubleðil sem hylur aðeins dýrðina á yður, en er haldið saman með mjóu bandi yfir mjaðmirnar og öðru sem gengur upp á milli þjóhnappanna, þá er þesslags dula brúkleg. Að öðrum kosti er mælt með góðum stuðningsbuxum sem ná niður fyrir sitjandann og upp að mitti. Ef til vill þykir yður þessháttar flík óyndisleg en ef þér hafið hug á að láta undan holdlegum fýsnum yðar gætuð þér tekið munúðarlegri buxur með yður í handtösku og brugðið yður á snyrtinguna til að skipta þegar komið er á áfangastað.

Einnig kemur til greina að vera brókarlaus undir kjólnum. Þetta á einkum við ef þér eruð háskólastúdína og hyggist nýta yður aðstöðuna á háskólasvæðinu, því nýlegar rannsóknir sýna að hætt er við að kavaléri elti yður inn á snyrtinguna ef þér hafið gefið honum undir fótinn. Því gæti farið svo að þér fengjuð lítið næði til þess að hafa fataskipti. Einnig skal á það bent að þótt þeir stúdentar sem gáfu viðtöl að þessu sinni séu svo ódannaðir að athafna sig á salernum, býður kapella guðfræðideildar upp á mun notalegri aðstöðu.