Hættið að bjóða okkur upp á svona þvælu

Mikið ofboðslega er þetta bull farið að fara í taugarnar á mér.

Það er ólöglegt að gefa börnum fíkniefni.
Það er ólöglegt að hafa kynferðislegt samneyti við börn, líka þegar peningar, fatnaður og dóp koma við sögu og reyndar telst það ennþá alvarlegra.
Fimmtán ára barn er ekki ábyrgt fyrir því að kæra mann fyrir að gefa sér fíkniefni. Börn eru heldur ekki ábyrg fyrir því að kæra menn fyrir mannrán, frelsisviptingu, nauðganir, siðferðislega þvingun og annað ofbeldi.

Hvernig væri að lögruglan sneri sér að því að eltast við alvöru bófa í stað þess að eyða púðrinu í að handtaka fólk fyrir að gagnrýna stríðsrekstur Bandaríkjamanna (sem Íslendingar styðja með aðild sinni að NATO)? Hvernig væri að þessir vesælingar bögguðu barnaræningja í stað þess að handtaka fólk fyrir það eitt að fara í taugarnar á yfirvaldinu og finna sér tylliástæðu til að ákæra það, þegar raunverulega ástæðan er andóf gegn valdníðslu? Já og hvernig væri að talsmenn þolenda, hætti að ljúga því að það sé svona útilokað að koma lögum yfir menn sem fela týnd börn, dópa þau upp og gera þau út til vændis?

Það er nefnilega haugalygi að vandamálið sé það að stelpurnar þori ekki að kæra. Annað hvort eru þessar sögur eitthvað orðum auknar eða þá að lögreglan er handónýt stofnun þar sem fullkomlega óhæfir yfirmenn vaða uppi.

Share to Facebook

1 thought on “Hættið að bjóða okkur upp á svona þvælu

  1.  ————————–
     
    Þess má geta að fyrir nokkrum árum leitaði ég sjálf til lögreglunnar vegna týndrar stúlku. Ég mætti fullkomnu áhugaleysi. Fyrst líkur voru á að stelpan hefði farið að heiman sjálfviljug, var EKKERT hægt að gera.

    Starfsmaður félagsþjónustunnar sagði mér síðar að lögreglan og félagsmálayfirvöld, vissu bæði nöfn og heimilisföng manna í nágrenningum sem hefðu oft boðið telpum undir lögaldri gistingu og dóp.

    Af hverju bankaði löggan ekki upp á hjá þessum mönnum? Af hverju bentu þeir mér ekki á að leita þar? Troðið þessu úrræðaleysi ykkar upp í hanskahólfið á ykkur.

    Posted by: Eva | 12.02.2011 | 11:37:02

     ————————–

    Vinsamlegast lesið innlegg Gunnlaugs Jónssonar við þessa frétt:http://www.dv.is/frettir/2011/2/12/islensk-ungmenni-gerd-ut-i-vaendi/

    Einnig er athyglisvert að yfirmaður lögreglunnar minnist þess ekki að svona mál hafi verið kærð eða að foreldrar hafi vakið athygli lögreglunnar á þessu. Annaðhvort er minni hans í ólagi eða þá að þessi tilvik eru hvorki jafn mörg né jafn alvarleg og gefið er til kynna

    Posted by: Eva | 12.02.2011 | 14:10:15

Lokað er á athugasemdir.