Þetta er hið ómengaða Ísland í dag. Af hverju voru skattpeningarnir mínir notaðir til að endalausra vegaframkvæmda en ekki til að bæta strætisvagnakerfið og gera mér þar með mögulegt að losa mig við bílinn?

Nú er planið að taka peningana mína af mér til að skapa fleiri störf sem Íslendingar ætla sér ekki að vinna, við iðnað sem hefur í för með sér óafturkræf umhverfisspjöll, og þjónar að nokkru þeim tilgangi mestu skítbuxaríkisstjórn veraldar að ná heimsyfirráðum, iðnað sem aukinheldur byggist á eyðingu regnskógana. Mér gremst það svo ekki sé meira sagt.

Ég bendi þeim sem hafa einhverja skoðun á því hvernig skattfé þeirra er varið, á þessa grein Mannvitsbrekkunnar og þessa eftir Sigurð Hólm. Þetta er virðingin sem við sýnum gamla fólkinu með því að kjósa sömu náttúruspellvirkjaeiginhagsmunasamtökin (dulbúin sem stjórnmálaflokka) yfir okkur aftur og aftur.

Ég hef ekki þann dug sem þarf til að hafa í frammi mótmælaaðgerðir sem líkur eru til að tekið verði eftir. En ég er búin að fá nóg af þessu svínaríi og lýsi hér með yfir því markmiði að afhenda Skattmanni eins lítinn hluta innkomu minnar og ég kemst upp með. Synir mínir verða þvingaðir til að sækja námskeið í skattsvikum. Ég mun jafnframt hvetja þá til þess að nýta sér þá kunnáttu til hins ýtrasta á meðan þeir sem ráðstafa skattfé landsmanna, líta á náttúruna og varnarlaust fólk sem ómerkilega aðskotahluti.

Því fé sem mér tekst að bjarga frá illvirkjasjóðum ríkisstjórnarinnar á þessu ári, mun ég úthluta þeim sem sýnir mér sannfærandi áætlun um að lækna íslenskan almenning af sinnuleysi sínu gagnvart umhverfismálum. Umsóknum skal skilað á netfang mitt.