Ríkið hefur ákveðið að fjórfalda framlag sitt til svokallaðra „afreksíþrótta“. Ekki til íþróttahreyfingarinnar almennt heldur til afreksíþrótta. 300 milljóna aukaframlag í tiltölulega fámennan hóp sem gerir ekkert sérstakt gagn. Hversvegna í fjandanum? Ég spurði að því á Fésinu í gær og ekki stóð á svörum. Netverjar töldu þetta gott mál af því að íþróttamenn eru svo góðar fyrirmyndir fyrir börn og unglinga og af því að það er svo gott fyrir þjóðarsálina þegar Íslendingum gengur vel í íþróttum á alþjóðavettvangi.

Þetta aukaframlag hefur náttúrulega ekkert með fyrirmyndir að gera. Styrkur til afreksfólks skilar sér ekki í bættri lýðheilsu og ef markmiðið væri að bæta lýðheilsu eða efla áhuga meðal barna þá hefði verið ákveðið að setja þennan pening í barnastarf eða greiða niður aðgang almennings að íþróttastarfi.

Seinni skýringin er mun sennilegri. Það er vissulega gaman og gott fyrir sameiningarandann að Íslendingur skori mark eins og sýndi sig rækilega þegar Íslendingar streymdu í tugþúsundatali á Arnarhól til að hrópa huh! En heldur fólk í alvöru að ríkisstjórnin ætli að setja 300 milljónir í það eitt að gleðja okkur? Heldur fólk virkilega að það búi ekkert meira að baki?

Áður en við gírum okkur upp fyrir næsta hóprunk skulum við staldra við og spyrja hvað er unnið við að hafa lýðinn á samfelldu þjóðrembufylleríi í marga daga. Hverjum er það til hagsbóta að þjóðin missi hreinlega áhugann á öllu öðru en gengi afreksmanns eða íþróttaliðs á stórmóti? Hverjum kemur það til góða þegar blaðamenn sinna nánast engu öðru en einu íþróttamóti í marga daga? Þegar 14 fréttir af 16 snúnast um eitt mark? Það skyldi þó ekki vera að sú hugmynd Rómverja, að með því að sjá lýðnum fyrir brauði og leikum sé hægt að komast upp með gerræðislega stjórnarhætti og slælega þjónustu, sé ennþá í fullu gildi?

Það er svo umhugsunarvert að karlalandsliðið í fótbolta skoraði þetta sögufræga mark án 300 milljóna aukaframlags. Ef þjóðrembuhóprunk á Arnarhóli og tveggja vikna frí frá áhuga fjölmiðla á brölti stjórnvalda kostar 100 milljónir, hvað fá ráðamenn þá fyrir 300 millur í viðbót?