Hvar er blaðið?

Birt þann af

„Gísli Freyr Valdórsson, aðstoðarmaður Hönnu Birnu Kristjánsdóttur innanríkisráðherra, sagði síðastliðinn fimmtudag að skjal innanríkisráðuneytisins um hælisleitendur sem vísað var til í fréttum Vísis og Mbl væri ekki til inni hjá ráðuneytinu. “

Bíddu nú við, var ekki Hanna Birna að tala um það á Alþingi í dag að þetta blað hefði verið sent mörgum stofnunum og lögmönnum? Ef blaðið er ekki til af hverju segir hún þá ekki að það sé ekki til? Og hvaðan kemur þetta blað ef ekki úr ráðuneytinu? Er einhver að falsa gögn?

Ég er með afrit af þessu minnisblaði. Hverjir höfðu aðgang að því utan ráðuneytisins?

http://www.dv.is/frettir/2013/11/25/raduneytid-heldur-gognum-fra-logmonnum/einhver að falsa gögn?

Fórnarlambsrunk dagsins

Birt þann af

Við konur eigum svo bágt. Við erum svo litlar og hræddar og lamdar og kúgaðar að jafnvel þótt staðreyndin sé sú að miklu fleiri karlar en konur látist vegna ofbeldis þá ber ÞÉR persónulega sem fulltrúa hins viðurstyggilega nauðgarakyns að hætta að vera svona mikið ógeð. En jafnvel þótt ÞÚ hættir að vera ógeð, sem þó er ólíklegt, munu flestir karlar halda áfram að halda okkur litlu og hræddu vesalingunum í heljargreipum og halda áfram að banna okkur að spila á hljóðfæri, senda okkur í brjóstastækkun og nauðga okkur og lemja.

Opinberum ranghugmyndir frekar en að þagga þær niður

Birt þann af

Ranghugmyndir þessa manns eru ævintýralegar. Moskubygging herstöð. Skipulagðar nauðganir múslima á sænskum konum af því að islam segir þeim að nauðga.

Ég held að það sé miklu áhrifaríkara að birta þvæluna sem rasistar halda fram en að draga þá fyrir dóm. Þeir sem sjá ekki í gegnum illskuna og heimskuna munu ekkert frekar átta sig þótt þessir skíthausar séu beittir viðurlögum.

Hreinsun

Birt þann af

„Holskeflur af afbrýðisemi, minnimáttarkennd, gremju, sjálfsvorkunn og hroka dundu á mér fyrirvaralaust en hurfu jafn skjótt og þær birtust. Það var engu líkara en það væri að hreinsast úr skúmaskotum hugans.“ segir maðurinn sem líður eins og meistara.

Eh -já. Ég verð líka brjáluð í skapinu og miður mín þegar ég er svöng. Það er ekki „hreinsun“ heldur eðlileg viðbrögð við næringarskorti.

Betri löggæslu takk

Birt þann af

Lögreglan í Vestmannaeyjum náði tveimur jónum um helgina og 5 grömmum af maríjúana líka. Heppnir eru Vestmannaeyingar. Annars hefðu jónurnar sennilega verið reyktar og Gvuð má vita hvernig það hefði endað. Sennilega í heróínsprautum en nú hefur þessum ungu konum verið forðað frá slíkum örlögum, þökk sé skynsamlegri fíkniefnalöggjöf.

Hvernig stendur annars á því að lögreglan gerir ekkert til þess að uppræta gvuðlast í íslensku samfélagi? Eða klámið maður, klámið!

Lögreglan þarf að gera klám- og gvuðlastsrassíu bæði í netheimum og í heimahúsum. Annars endar þjóðmenningin í einni allsherjarorgíu. Það gæti jafnvel endað með því að Helvíti yfirfyllist af fordæmdum sálum.