Nú þegar þolendurnir hafa fengið bætur á þeirri forsendu að það sé hafið yfir vafa að brotin hafi átt sér stað og það hefur verið staðfest í fjölmiðlum að fyrir liggi skrifleg viðurkenning frá Gísla sjálfum, kemur fram krafa um að þolendur og blaðamenn verði beðnir afsökunar.

Það er virkilega ömurlegt ef fórnarlömbin hafa verið lögð í einelti og vitanlega ættu þeir sem það hafa gert að viðurkenna að þeir hafi komið illa fram. En það réttlætir ekkert þessa umfjöllun DV á sínum tíma eða önnur mál þar sem fólk hefur verið stimplað glæpamenn án þess að málin hafi farið fyrir dóm. Fyrir skömmu benti ég á eitt slíkt mál sem einmitt er á ábyrgð DV

https://www.facebook.com/eva.hauksdottir.norn.is/posts/405766532835924

Rúv hefur tekist að setja nýtt met í ömurlegheitum með þættinum um Jón Múla. Maður hefði haldið að einhverjir ástsælustu listamenn sem Ísland hefur alið og þessir frábæru menntaskólakrakkar væru efni í góðan þátt en þetta var bara sundurleitt samklastur af úrklippum. Mér finnst þetta efni verðskulda metnaðarfyllri meðhöndlun.

Sú ákvörðun að birta pistla á Eyjunni hefur vafist fyrir mér. Að sumu leyti af því að mér þykir vænt um lénin mín. Að sumu leyti af því að ég er ekki hrifin af útliti Eyjunnar og finnst dálítið kvíðvænlegt að geta ekki stjórnað útlitinu á mínu svæði sjálf. Auk þess er ég ofboðslegur tækniklaufi en það stoppar mig ekkert í því að prófa eitthvað sem ég kann ekki á, svo ég sá fyrir mér endalaust vesen ef ég gæti ekki kvabbað í mínum eigin sérlegu aðstoðarmönnum til að laga til eftir mig þegar ég er búin að klúðra einhverju.

Ég lenti strax í smávegis tækilegum vandræðum þegar ég fór fyrst inn á vefsvæðið. Varð auk þess frekar pirruð þegar ég sá að lokað er fyrir möguleikann á að setja inn viðbætur. Ég hafði samband við umsjónarmann vefsins, Birgi Erlendsson og spurði hvort hann gæti aðstoðað mig. Það var síðla kvölds og ég átti alls ekki von á svari fyrr en í fyrsta lagi næsta dag en viðbrögðin komu ánægjulega á óvart. Viðbótin var sett inn strax, öllum spurningum svarað vel og skilmerkilega og öll vandamál leyst í hvelli.

Ég er hæstánægð með þessa þjónustu; eða eins og netverjar segja “læk!”

Í pistli sem ég skrifaði í morgun kemur fram bagaleg villa en ég sagði að svo virtist sem Smugan hefði ætlað að taka vitleysuna upp eftir DV.

Fyrirsögnin sem kemur fram í vefslóð Smugunnar, og olli greinilegum misskilningi svosem sjá má af ummælum í umræðukerfinu sem og af því að þekktir bloggarar töldu víst að maðurinn væri í samfélagsþjónustu, er semsagt kveikjan að frétt DV en ekki öfugt.

Ég hefði þurft að fara betur yfir áður en ég birti þetta og kann ég Ingimar Karli Helgasyni bestu þakkir fyrir að vekja athygli á því að það er Smugan en ekki DV sem ber mesta ábyrgð á þessari röngu frétt.