Ég er ekki mikið fyrir áramótaheit en í þetta sinn lofa sjálfri mér því að taka myndir eða sjá til þess að þær verði teknar við öll tilefni sem mig langar að muna. Það gæti jafnvel endað með því að ég læri á snjallsímann eða a.m.k. myndavélina á honum.

Ég á ekki margar myndir af strákunum mínum frá því að þeir voru litlir og nánast engar frá fullorðinsárum. Get ekki útskýrt hversvegna ég hef verið svona sinnulaus. Nú er m.a.s. snjallsími á heimilinu en ég nota hann nánast aldrei. Úr því skal nú bætt. Ekkert partý, ferðalag, athöfn eða annar viðburður án mynda 2018. Og þar sem markmið eiga að vera mælanleg ætla ég að taka eða fá einhvern til að taka a.m.k. eina birtingarhæfa mynd vikulega hvort sem tilefni er til þess eða ekki.

Fyrsta tilefnið var í gær. Nýársboð á Ásvallagötunni. Ég gleymdi náttúrulega símanum. Mundi samt eftir þessu og fékk að taka mynd á símann hennar Steinunnar.  Þessi mynd skýrir kannski af hverju ég tek aldrei myndir. Ragnhildur tók efri myndina.