Hvað eiga Gvuð og Osama bin Laden sameiginlegt?
Fólk deilir um hvort þeir séu til eða ekki. Hvort þeir séu dauðir eða ekki
Hvort sem þeir eru til eða ekk gegna þeir fyrst og fremst því hlutverki að auka, tryggja og viðhalda fáránlega miklum völdum stofnana sem þrífast á ótta almennings við þá.
Báðir reka heimsvaldastefnu sem áhangendur þeirra telja að sé gott svar við heimsvaldastefnu annarra en hvorugur hefur þó náð sérstökum árangri í viðleitni sinni til að stjórna heiminum.
Af hverju er sú mýta að Íslendingar trúi á álfa svona lífseig? Hið rétta er að hátt hlutfall Íslendingar aðhyllist óskilgreindan spíritistma. Þeir skýra undarlegar tilviljanir gjarnan með aðkomu framliðinna en þar sem þeir eru hreint ekki vissir í sinni sök, finnst þeim hroki að fullyrða að það geti ekki allt eins verið álfar eða aðrar náttúruvættir sem eiga í hlut. Það merkir þó ekki að þeir trúi á álfa. Ég efast um að meira en 1% fullorðinna Íslendinga trúi á huldufólk.
Til hvers að líta út fyrir að vera yngri? Langar einhvern að vera unglegur feitur, unglegur með kransæðastíflu, unglegur í fatnaði sem lítur út eins og tjald, unglegur í svitakófi, unglegur með sykursýki, unglegur með exem í fellingunum, unglegur í stöðugri baráttu við fáránlega löngun til að éta allar kökurnar í bakaríinu, unglegur með æðahnúta?
Offita er raunverulegt vandamál sem hefur í för með sér heilsubrest og getur leitt til ótímabærs dauða. Hún stafar í langflestum tilvikum af ofáti og ofát er hegðunarvandamál sem fólk getur tekist á við og upprætt hjá sjálfu sér. Að reyna að sætta fólk við slík vandamál með því að höfða til hégómagirndar er sjúkt, rangt og tilgangslaust.
Fólk yfir fertugu hefur fulla ástæðu til að óttast aukakílóin. Það er bara ósköp einfaldlega þannig að eftir fertugt geta fæstir reiknað með að halda áfram að troða í sig heilum kexpakka yfir sjónvarpinu án þess að hann setjist á maga og mjaðmir. Lausnin á því er einföld, maður hættir bara að kaupa kex þegar maður hefur augljóslega ekkert með það að gera. Og ég bara skil ekki hvað er svona sorglegt við það.
 |
Fitan yngir upp |
Einhver Gunnar Sveinsson skrifar í sunnudagsmoggann í tilefni af úrfellingu kristilegs siðgæðis úr námskrá grunnskólanna. segir m.a.
Þótt samstarf við skólana sé á þeirra forsendum eins og rætt er um getur Þjóðkirkjan eða biskup að mínu áliti aldrei samþykkt að fella niður að starfshættir skólanna mótist af kristilegu siðgæði.
Æjæ. Getur Þjóðkirkjan ekki samþykkt það? Það var nú leitt en því miður, Þjóðkirkjan ræður bara ekki rassgati um skólastarf í landinu. Þjóðkirkjan ræður reyndar ekki einu eða neinu fyrir utan sitt eigið starf og kann ég Siðmennt og Vantrúarmönnum bestu þakkir fyrir að opna augu Þorgerðar Katrínar og almennings í landinu fyrir því.
Saltkjöt er bráðdrepandi.
Grillmatur er krabbameinsvaldandi.
Rauðar M&M kúlur líka.
Kleinur valda kransæðastíflu.
Og kokteilsósa.
Kaffi veikir ónæmiskerfið.
Sykur veldur offitu, geðveiki og sykursýki.
Aspartam er gríðarlega hættulegt.
Líka MSG.
Og nú Tófú.
Ég held ég sé að ná þessu. Fólk deyr af völdum fæðu. Hver munnbiti sem þú kyngir, færir þig nær sjúkdómum og dauða.