Ég held að kynjakvótar séu almennt afleit aðferð til þess að jafna kynjahlutföll, einkum í stjórnmálum og sú hugmynd að taka upp kynjakvóta á Alþingi stríðir beinlínis gegn lýðræðinu.
Þar fyrir utan er bara engin þörf fyrir kynjakvóta í pólitík. Stjórnmálaþátttaka kvenna er orðin sjálfsögð og þar með jafnast hlutföllin án afskipta ríkisvaldsins. Þar sem nóg framboð er af hæfu fólki af báðum kynjum og góð þátttaka í kosningum verður útkoman í takt við framboðið.
Þetta sýndi sig t.d. rækilega í kosningunum til stjórnlagaþings. Mikið hafði verið rætt um nauðsyn kynjakvóta fyrir þær kosningar en þar sem um 40% þeirra sem náðu kjöri voru konur, kom ekki til þess að kynjakvóta væri beitt.
Píratar hafa ekki tekið hugmyndina um fléttulista upp á arma sína, en hvað gerðist í prófkjörinu í gær? Jú, listinn var nánast fléttaður upp í 12. sæti. Í fjórum efstu sætum voru tvær konur og tveir karlar og í 5.-12. sæti voru fjórar konur og fjórir karlar. Þetta eru sannarlega gleðilegar fréttir en koma þó ekki á óvart. Þetta hefur verið svipað í öðrum kjördæmum og kynjahlutföll í efstu sætum á listum Pírata voru einnig nokkuð jöfn fyrir síðustu Alþingiskosningar.
Og nei, skýringin er ekki sú að Píratar séu afbragð annarra kjósenda. Þar er álíka hátt hlufall af ösnum og í öðrum stjórnmálaflokkum. Málið er að virk þátttaka kvenna er einfaldlega besta leiðin til að uppræta kynjafordóma, hvort heldur er á vettvangi stjórnmálanna eða annarsstaðar. Þegar nógu margar konur eru virkar og gefa kost á sér, er kjósendum bara alveg treystandi til að nýta atkvæðisrétt sinn í þágu kynjajafnræðis, án afskipta ríkisvaldsins.
Helgisagan um fæðingu Jesú er á þessa leið: Ágústus keisari vill taka manntal og Jósef…
Ég var beðin um stutt fréttarant fyrir Lífið á Fréttablaðinu í dag. Þetta hef ég…
Gefum okkur að "rétt mál" sé það sem málsamfélagið kemur sér saman um. Látum andartak…
Sumarið 2020 var þáverandi yfirlæknir Heilbrigðisstofnunar Suðurnesja, Skúli Tómas Gunnlaugsson, sviptur starfsleyfi vegna margháttaðra afglapa…
Margur karlinn er svo heillaður af dindlinum á sér að hann finnur sig knúinn til…