Alcoa fær ekki krónu. Nananananana!
Ríkið á hinsvegar rétt á bótum vegna óhlýðni sonar míns við verði laganna en honum er slétt sama um það (það er álmafían sem er óvinurinn) og því réttlæti mun hvort sem er aldrei verða fullnægt.

Ég sé ekki alveg lógíkina í því að gefa stráknum færi á að taka tvær vikur í að lesa anarkistabókmenntir á fríu fæði. Það fyrirkomulag hentar honum einmitt prýðilega og hafi skyldleiki hans við glottköttinn einhverntíma verið áberandi þá var það þegar hann fékk fréttirnar. Þótt ég standi fullkomlega með honum finnst mér frekar blóðugt fyrir ríkið að þurfa að punga út helling af peningum handa fangelsisbattríinu, til þess eins að strákur sem engum stafar nein hætta af, geti montað sig af því að hafa látið ríkið borga sér 893 kr á tímann, 16 tíma á dag fyrir að læra hryðjuverkatrix. Hefði verið meira vit í að skikka hann til samfélagsþjónustu. Hann myndi að vísu aldrei upplifa það sem refsingu enda hefur honum alltaf verið skítsama um peninga, en hann myndi sinna hverju því starfi sem honum yrði fengið vel og brosandi og það hefði þó komið einhverjum að gagni.

Hafi sonur minn Byltingin lært eitthvað af þessum málaferlum er það einfaldlega að þetta mótmælabrölt sé fullkomlega þess virði að standa í því.