Að tengja á heimildir

Þegar ég les erlendar fréttir (sem langoftast eru teknar upp úr erlendum miðlum) vil ég geta skoðað upprunalegu fréttina. Ég geri það ekkert alltaf en ég vil eiga kost á því án þess að leggjast í rannsóknarvinnu.

Almennt er talin góð regla að geta heimilda þegar maður notar efni annarra, einkum þegar það er tekið upp óbreytt. Að gera það ekki varðar m.a.s. við höfundarréttarlög. Íslenskir blaðamenn virðast almennt algerlega ómeðvitaðir um þessa ágætu reglu, allavega rekst ég daglega á erlendar fréttir sem maður þarf að hafa verulega mikið fyrir að grafa upp hvaðan eru fengnar. Stundum er fréttamiðlinn sem fréttin er tekin eftir nefndur en sjaldgæft er að netmiðlarnir tengi á heimildir. Þetta á einnig við um margt sem haldið er fram sem vísindalegum staðreyndum. „Rannsóknir sýna…“ og svo kemur t.d. einhver vafasöm næringarfræði eða fullyrðingar um fylgni milli typpastærðar og þess að hafa bólu á nefinu eða eitthvað álíka gáfulegt en „rannsóknina“ sem vitnað er í er hvergi að finna.

Ég skil ekki af hverju þetta er vandamál. Maður þarf ekki að vita neitt um meðferð heimilda til að setja inn tengil. Það eina sem þarf að kunna er að aftira vefslóðina og klístra henni inn í fréttina. Getur einhver útskýrt fyrir mér af hverju þessi fljótlega og þægilega leið er ekki notuð meira? Það er sennilega ekki vegna þess að fréttamenn kunni það ekki.