Regnbogabörn baka handa LÍÚ

Frá píslargöngu LÍÚ

Regnbogabörn og ömmur þeirra hafa lýst yfir samúð sinni með LÍÚ en sem kunnugt er hefur sambandið sætt miklu einelti af hálfu almennings um langt árabil.

„Við vorum búin að baka skrilljón Gyðingakökur handa kallagreyjunum og ætluðum að færa þeim eftir píslargönguna þeirra á föstudaginn en löggan kom og gasaði okkur öll“ sagði Hallfríður Guðjónsdóttir, regnbogaamma, í samtali við Pistilinn.  Aðspurður hvort aðgerðir lögreglu teldust  ekki fullharkalegar, sagði Stefán Smári Þórisson, yfirmaður heilsuvarnardeildar lögreglunnar að aðgerðinni hefði síður en svo verið beint gegn málstaðnum.

„Þetta snýst bara um heilbrigðissjónarmið. Maður veit ekkert hvar þessar hornasir og ömmur þeirra hafa verið með lúkurnar og ekki vert að láta þetta eitra fyrir ofsóttasta minnihlutahópi samfélagsins“ sagði Stefán Smári og bætti því við að hver sá sem sæist reyna að selja kókópöffs útí í frímó, mætti eiga von á svipuðum aðgerðum.

Þess má geta að grátkór LÍÚ hlaut barlóminn í söngvakeppni blóraböggla á föstudaginn langa, með laginu „The Winner Takes it All“. Í öðru sæti var Ofnýtingarflokkurinn sem flutti „Fools Rush In“ í tilefni nýrrar rammaáætlunar sem að sögn talsmanns flokksins er mega kúl og næstum eins sexý og kvótakerfið.