Erfðafræði kynþáttahatara

Skilgreining kynþáttahatara á hvíta kynstofninum og þeim einkennum sem ber að vernda

Ef ég skil kynþáttahatara rétt, vilja þeir halda stofninum í eins upprunalegu formi og mögulegt er. Nú telja margir vísindamenn (gott ef ekki yfirgnæfandi meirihluti) að hvíti kynstofninn hafi þróast frá svörtu fólki, þannig að ef ætlunin væri að komast nær upprunanum væri væntanlega gott að hvítir æxluðust með svörtum. Ég virðist þó eitthvað hafa misskilið þessa upprunaást þeirra. Mjölnir útskýrir:

„Þú gætir sagt að hundar þurfi að blandast úflum „bara til þess að komast nær uppruna sínum“, eða að bonapo simpansar þurfi að blandast eldri simpansategundum, ísbirnir að blandast skógarbjörnum, allt til þess að komanst nær uppruna sínum. Líf þróast áfram og sníst líffræðileg þróun ekki um uppruna heldur áframhald og aðlögun.“

Já ég hélt einmitt að kynstofninn væri að þróast með því að blandast öðrum en þetta snýst víst heldur ekki um þróun því hann segir einnig að kynþættir (og reyndar einnig menning) þróist ekki við blöndun heldur í einangrun. Það væri voða gott ef væri hægt að fá einhvern botn í þetta.

Nú gæti einhver haldið að til að geta verndað kynstofn, þá þurfi menn fyrst að vera sammála um það hvernig kynstofninn skuli skilgreindur. Þar sem ljóst er að enginn „ómengaður“ hvítur stofn er til, þá þarf væntanlega að setja einhver viðmið um það hversu mikinn skyldleika við óæðri stofna við þolum, án þess að blöndun kynþátta flokkist sem þjóðarmorð. Ekki stendur á svörum; við bara sjáum það á útliti fólks. Eða eins og Mjölnir segir:

„Þrátt fyrir þá staðreynd að allir geta klárlega þekkt í sjón hver tilheyrir hvaða kynstofni, þá virðist þú vera að heimta að skilgreiningin á kynþáttum sé ekki nógu „skýr“ vegna þess að smávægileg blöndun hefur orðið á milli þeirra. “

Ég bíð enn eftir svari um það hvort litla, hvíta svertingjastelpan á myndinni flokkist sem „skítaskinn“ og hvort ástæða sé til að hindra að hún flytji til Íslands vegna hættunnar á því að hún mengi hinn hreina stofn.

Hugmyndir kynþáttahatara um þau einkenni stofnins sem ástæða er til að vernda

Enda þótt kynþáttahatarar séu fráhverfir kynþáttablöndun, gildir þó annað um ýmis útlitseinkenni sem eru að mestu bundin við hvíta menn. Ekki þykir sérstök ástæða til að takmarka umgengni hvítra manna sín á milli enda þótt sumar erfðaeigindir séu víkjandi, heldur virðist þetta snúast um að halda blóðinu hreinu, fremur en að viðhalda útlitseinkennum svosem rauðu hári og bláum augum. Eins og Mjölnir bendir á þá eru þetta einkenni INNAN stofnins. Ennfremur segir hann:

„Rautt hár er í fyrsta lagi genagalli sem eitt gen orsakar, það eru hinsvegar mjög mörg gen sem að gera upp kynþátt. Hvítir eru síðan sér stofnsabrigði af homo sapiens, rauðhærðir eru ekki stofn þar sem rautt hár getur hoppað á milli kynslóða. Svipgerðir blökkmans geta ómögulega þróast innan hvíta kynstofnis, sama með blökkumenn, þessvegna eru hvítir of svartir sitthvort afbrigði. Þú fattar þettað ekki enþá er það nokkuð?“

Nei, ég verð að játa að ég skil þetta ekki ennþá en ég er öll af vilja gerð að læra. Fer því fram á að kynþáttahatarar skýri betur fyrir mér þessa nýstárlegu erfðafræði. Gott væri t.d. að fá svar við því hvaða útlitseinkenni nákvæmlega þeir vilja vernda.