Að styðja beinar aðgerðir

Undanfarið hefur margt fólk komið að máli við mig og talað um að það styðji málstað og aðfarir aktivista en geti sjálft ekki tekið áhættu á að missa vinnuna vegna aðfara sem vinnuveitandanum hugnast ekki eða verða handtekið eða sé hrætt við að meiðast ef lögreglan gangi hart fram.

Allt þetta fólk getur sýnt stuðning sinn án þess að taka áhættu. Það sýnir t.d. stuðning ef hópar fólks standa í dálítilli fjarlægð og fylgjast með og það veitir bæði lögreglu og þeim mótmælendum sem hugsanlega gætu misst stjórn á skapi sínu ákveðið aðhald að hafa marga áhorfendur.

Það er einnig þörf fyrir fólk sem er tilbúið til að koma að skipulagningu, afla upplýsinga, útbúa mótmælaspjöld og borða, vera bílstjórar, taka myndir, halda utan um ýmis gögn, láta í té fundaaðstöðu, vera tengiliðir milli hópa o.s.frv.

Aðgerð sem allt venjulegt fólk getur stutt án áhættu er fyrirhuguð næsta þriðjudag. Þá ætla aðgerðasinnar að hindra inngöngu ráðherra á ríkisstjórnarfund, líkt og síðasta þriðjudag. Þeir sem vilja vera með, hvort sem er til að taka beinan þátt eða bara vera á staðnum og sýna stuðning með því að hrópa slagorð, syngja, eða hvað sem fólki kann að detta í hug, ættu að kíkja hingað inn á mánudagskvöld til að fá upplýsingar um stað og stund.

Þeir sem hafa áhyggjur af almenningsálitinu eða óttast að missa vinnuna, ættu þó að forðast að láta andlit sitt nást á mynd.

Þeir sem styðja aðgerðina en komast alls ekki á staðinn, geta sýnt stuðning sinn með því að skrifa um hana eða svara neikvæðri gagnrýni. Okkur þykir auðvitað vænt að fólk sé með okkur ‘í anda’ en við elskum ykkur ennþá meira ef þið eruð með okkur í raun.