Blaðamennirnir Jón Bjarki Magnússon og Jóhann Páll Jóhannsson flettu ofan af einu stærsta hneykslismáli síðustu ára; Lekamáli Innanríkisráðuneytisins. Málið snerist um ólöglega meðferð upplýsinga. Aðstoðarmaður ráðherra afhenti fjölmiðum, ekki aðeins viðkvæmar persónuupplýsingar um hælisleitendur, heldur einnig rangar og ærumeiðandi upplýsingar.
Allir þekkja það afrek blaðamannanna tveggja að upplýsa málið, þrátt fyrir mikið andstreymi allt þar til ljóst varð að ráðherra hafði ítrekað veitt rangar og villandi upplýsingar, auk þess að reyna að hafa áhrif á rannsókn málsins. Færri vita að Jón Bjarki heyrði fréttirnar fyrst í Harmageddon. Haukur hafði brugðist snarlega við þegar hann sá umfjöllun um trúnaðarmál í fjölmiðlum, sótt Evelyn og bankað upp á hjá Harmageddon. Og hér er í fyrsta sinn fjallað um þá hlið málsins í fjölmiðlum.
