Undanþágu til að ræna menntamálaráðherra takk

Liggi fyrir rökstuddur grunur um að tiltekinn einstaklingur sé öðrum hættulegur, er hægt að fá hluta af mannréttindum hans aflétt, tímabundið. Það er hægt að svipta hann frelsi, dæma hann til að greiða sektir fyrir glæpi sem sannanir finnast fyrir eða taka frá honum það sem fullvissa er fyrir að hann hafi stolið.

Liggi fyrir yfirlýsing um að það henti ríkinu eða einhverju stórfyrirtækinu að gjörnýta náttúruauðlindir, er hægt að svipta friðlýsta náttúru auðæfum sínum, varanlega. Náttúran á rétt á talsmönnum, alveg eins og glæpamenn. Munurinn er bara sá að það er ekkert hlustað á talsmenn náttúrunnar, sem þó eru ekki fyrir dómi vegna eigin afglapa, heldur vegna þeirra illvirkja sem aðrir vilja fremja á henni. Ef við værum sjálfum okkur samkvæm drægjum við fórnarlömb nauðgana fyrir dóm.

Mér finnst að ætti að setja á fót stofnun sem getur gefið undanþágur frá friðhelgi heimila ráðamanna þegar mig langar í eitthvað sem þeir eiga. Þorgerður Katrín á t.d. helvíti flott hús. Mig langar í húsið hennar. Get ég fengið undanþágu til að taka það frá henni? Af hverju? Nú af því að það er flott og mig langar í það.

Það myndi hvort sem er ekki skaða Þorgerði Katrínu. Hún gæti bara flutt eitthvert annað. T.d. heim til Sivjar Friðleifsdóttur.