Sonur minn Byltingin: Mamma, má ég fá blómavír hjá þér?
Mamman: Alveg sjálfsagt.
Byltingin: Heyrðu, hvað heldurðu að Össur Skarphéðinsson sé þungur?
Mamman: Ég hef nú bara ekki vigtað hann nýlega, af hverju ertu að spá í það?
Byltingin: Ég er bara að spá í hvort þrefaldur blómavír haldi honum. Hann er náttúrulega feitabolla svo það gæti þurft eitthvað haldbetra.

Ég banna honum að prófa burðarþolið með því að hanga í trjánum sem skreyta loft Nornabúðarinnar.Hann fer inn fyrir með blómavírinn og baukar eitthvað góða stund. Ég velti því fyrir mér hvað hann sé að bardúsa en trufla hann ekki, reikna fastlega með að það komi í ljós.

Byltingin: Mamma, við ætlum að hengja Össur Skarphéðinsson á Austurvelli á miðnætti. Viltu koma og sjá?
Mamman: Já endilega.
Byltingin: Mamma, hvar er bíllinn?
Mamman: Ég lánaði einhverjum aktivistum hann.
Byltingin: Æ andskotinn. Ég ætlaði að biðja þig að skjótast og sækja Össur svo við gætum hengt hann.

***

Í stað þess að hengja Össur í eigin persónu útbjó Haukur stóra brúðu og um kvöldið fórum við með hana niður í bæ ásamt friðu föruneyti. Þar fann Haukur þennan fína gálga (eftirlitsmyndavél) og hengdi brúðuna við nokkra hneykslun vegfarenda. Hann var ekki mikið hrifnari af eftirlitsmyndavélum en Össuri og nokkuð sáttur við að hafa dissað eftirlitissamfélagið í leiðinni. Ef ég man rétt fór aftakan fram á Ingólfstorgi frekar en Austurvelli. Við vorum því miður ekki með myndavél.

Össur var iðnaðarráðherra á þessum tíma og hélt sömu stóriðustefnu og forverar hans. Ég veit ekki hvort hann frétti nokkurntíma af þessu en hann hefur þykkari skráp en Valgerður.

Share to Facebook