Kokhreysti hlýtur að merkja að hafa hraust kok. Kokhraustur maður þolir væntanlega sýkla og eiturgufur án þess að fá hálsbólgu.

Ég er ekki kokhraust. Halda áfram að lesa →

Síðustu nótt braust einhver inn í búðina mína án þess að valda neinum skaða svo vitað sé. Í nótt hafði einhver fyrir því að rífa númeraplötu af bílnum mínum og leggja hana snyrtilega ofan á toppinn.

Ef bíllinn hefði staðið við búðina eða á planinu fyrir framan blokkina þar sem ég bý, hefði ég velt því fyrir mér hvort sama fólk hefði verið að verki. Ég hef hinsvegar ekki trú á því að ég eigi svo ötula umsátursmenn að þeir hafi komist að því að ég yrði niðri í miðbæ, á bílnum, í nótt. Ég er ekki beinlínis þekkt fyrir djammfíkn og hef ekki rætt áform mín um að verða mér úti um lungnakrabba og skítalykt í kvöld, við neinn nema Önnu. Tel því ósennilegt að nokkur tengsl séu á milli þessara atburða, nema þá helst táknræn. Þau eru hinsvegar staðfesting þess að ég hef dottið niður á sérdeilis góðan þjófagaldur.

Nú þarf ég að kynnast duglegri konu sem getur þrifið, bakað, farið í sendiferðir, lesið í bolla og tarotspil eða kristalskúlu eða einhvern fjandann, bruggað töfradrykki, útvegað flotta steina, fjaðrir, klær og tennur, séð um bókhaldið, sýnt fólki með vandamál lifandi áhuga og þagað yfir leyndarmálum, saumað, málað rúnasteina, sagað og borað, selt galdrauppskriftir og listmuni, haldið stutta fyrirlestra og verið skemmtileg allt að 14 tíma í senn, allt saman fyrir fimmhundurð kall á tímann. Má ekki vera fíkill (tóbaksfíklar eru líka fíklar), fátæklingur eða dramadrottning og ekki beina vinnufíkn sinni að einhverju öðru fyrirtæki en mínu.

Þeir sem þekkja brjálaðan vísindamann sem gæti búið til svona konu handa mér eru beðnir um að hafa samband.

Ef nokkuð er heimilislegra en karlmaður með borvél, þá er það karlmaður með skrúfjárn, sem gengur um íbúðina, herðir skrúfur og leitar að verkefnum.

Mammon vissi hvað hann var að gera þegar hann sendi mig til Málarans.

Já, bæ ðe vei, ég sagði HEIMILISLEGT, ekki æsandi.

-Kærastakandidat? spurði Drengurinn sem fyllir æðar mínar af endorfíni.
-Nei, þetta var bara Málarinn. Hann ætlar að fixa pípulagnirnar hjá mér.

Löng þögn.

-Bara vinnuskipti yndið mitt. Hann er sómamaður og það er ekkert á milli okkar.
-Ekkert nema pípulagnir.

Löng þögn.

-Pííííííp!
-Þegiðu eða ég flengi þig.
-(Fliss) Spurning hvort okkar hefði meira gaman af því.
-Taktu þetta glott af andlitinu drengur.
-Ókei kennari. Það er bara svo skondið þetta táknræna samhengi þitt.

Mikið óskaplega er heimilislegt að hafa karlmann með borvél á heimilinu. Karlmenn ættu alltaf að hafa borvél innan seilingar. Eiginlega ætti karlmaður að fylgja hverri borvél.

Í augnablikinu á ég engan ógreiddan reikning og er aðeins með íbúðar- og námslán á bakinu. Það er góð tilfinning sem ég upplifði síðast fyrir heilu ári. Þá tók ég lán til að opna búðina en nú er það uppgreitt! Vííí! Halda áfram að lesa →

Drengurinn: Ég hef oft velt því fyrir mér hvers vegna þú sért svona skotin í mér. Er það semsagt af því að ég er skegglaus?
Eva: Ég hef oft velt því fyrir mér af hverju þú sért svona viss um að ég sé skotin í þér.
Drengurinn: Ætlarðu kannski að neita því?
Eva: Ég hef aldrei neitað því. Halda áfram að lesa →

Mig vantar bor svo ég hafði þá eftir allt saman fína afsökun til að taka sumarfríið mitt út í dag og eyða deginum yfir Draumalandinu, krossgátu og kappútsínó. Mér finnst það í alvöru fullkomin nýting á frídegi. Kannski er ég að verða gömul. Ég hefði auðvitað vel getað fundið mér eitthvað arðvænlegra en þarf að pósa fyrir málarann í kvöld. Ég hef nú yfirleitt verið í fríi á sunnudagskvöldum svo ég get litið svo á að ég hafi tekið helgarfríið fyrirfram.

Systir mín reykhættan sendi Eika til mín með yndislega postulísbrúðu. Er að monta sig af hitastigi sem jafnast á við Helvíti, ekki langar mig til Jótlands á meðan ástandið er þannig. Það væri nú fínt ef þau gætu sent okkur svosem eins og 12°C, það yrði þá hæfilegt á báðum stöðum. Sakna hennar samt ósköpin öll og ef Mammon heldur áfram að sýna mér velþóknun, ætla ég að taka mér nokkurra daga haustfrí og skreppa til þeirra. Mér hrís reyndar hugur við ferðalaginu. Trúi því tæpast að það myndi ekki svara kostnaði að halda uppi mánaðarlegu flugi til Billund yfir veturinn.

1. verkefni

Fáðu þér stóran hund með lafandi tungu.

Láttu hundinn sleikja þig í framan. Halda áfram að lesa →

-Mammon blessi búðina, sagði ég og strauk sjóðsvélinni ástúðlega.
-Drottinn blessi Mammon, sagði Grasakonan hin sannkristna og hvort sem það var nú Drottni hersveitanna eða Mammoni að þakka, hringdi enn einn hópurinn og bað um kynningarkvöld með feitri pastasósu og veraldarinnar bestu mokkatertu.

Í morgun fór ég í bíltúr út í sveit til að sækja verkefni að dunda við. Uppfinningarmaðurinn spurði hvort ég vildi taka að mér eitt verk til viðbótar. Þá varð Mammon glaður.

Ég sé ekki fram á að nota sunnudaginn til að ráða krossgátur og eltast við stráka. Og er það vel.

-Sumir í vinnunni hjá mér lesa bloggið þitt, segir Drengurinn sem fyllir æðar mínar af Endorfíni.
-Jæja, það var nú gaman en varla hefur þú verið að auglýsa mig? svara ég
-Nei, ég setti bara upp pókersvipinn þegar einhver fór að tala um þig í gær.
-Þannig að vinnufélagar þínir vita ekki að þú ert ein af aðalpersónunum í vefbókinni minni?
-Nei en ég held að það kæmi samt engum þeirra á óvart. Halda áfram að lesa →

Heimilið lyktar eins og kertagerð. Ég er jafnframt því að steypa kerti búin að nota allan daginn til að þrífa og er enn ekki búin að fara í gegnum skápana. Þvottahúsið kjaftfullt af þvotti og samt eru báðir strákarnir mínir að heiman. Halda áfram að lesa →