Getur verið að sé leynivinaleikur í gangi hjá löggunni á Akureyri? Undanfarið hafa komið mjög margar flettingar þaðan á þessa gömlu færslu. Langflestar flettingar frá tmd eru á færslur þar sem ég tjái mig um heilaþvottinn og hundsháttinn sem lögregluþjónar þurfa að undirgangast til að geta sinnt starfinu eins og til er ætlast svo þetta stingur dálítið í stúf.

Einu sinni var ég á vinnustað þar sem allskyns væmni var viðhöfð. M.a. svona leynivinaleikur. Það var náttúrulega ofur hallærislegt og þótt leiknum sé ætlað að bæta starfsandann, held ég að það þurfi að ríkja sæmilegur andi fyrir til þess að svona leikur virki. Það er ekki alltaf gott að sjá hvað er orsök og hvað er afleiðing en yfirdrifin væmni stjórnandans á staðnum hefur sennilega átt stóran þátt í því að nógu góður andi ríkti á vinnustaðnum til að forsenda væri fyrir svona væmni. Annars man ég ekkert hver var leynivinur hvers, bara að ég notaði þetta tækifæri til að senda fólki sem átti það skilið blóm, án þess að það grunaði að þau væru frá mér.

Líklega eru löggurnar á Akureyri nú að klóra sér í kollinum og reyna að finna upp á einhverju frumlegu til að gleðja leynivininn og eðlilegast er náttúrulega að leita ráða hjá norninni. Sko gæjs: Eðlilegt fólk reynir að gleðja leynivininn með því að smyrja samloku handa honum, skrifa sæt skilaboð á kort eða lauma heillagrip í vasa. Það færi ykkur sennilega illa að gera eitthvað frumlegt svo ég mæli með því að þið tjáið leynivininum náungakærleika ykkar með því að fylla á gasbrúsa vinarins eða smyrja handjárnin.

Nema skýringin á þessum áhuga á reynslu minni af leynivinum sé sú að þeir séu að undirbúa aðgerð gegn hryðjuverkamönnum og séu að leita að efni í góðan njósnara.