Hvalfjörður er bara ekki íslenskur í dag. Enginn kræklingur finnst í þessari endalausu fjöru, líklega þrífst hann ekki í sundlaugarvolgum sjónum og aðeins örfáir fuglar sjáanlegir. Sjálfsagt skortir þá æti en auk þess er íslenski herinn (allir tveir meðlimir hans) skjótandi út í loftið eins og vitleysingar. Ég veit ekki hvað ég þykist vilja til Palestínu. Það eru greinilega ágætar líkur á að verða fyrir slysaskoti hér heima.
Sjórinn hefur vikið og við förum úr skónum og öslum volga leðjuna, langt út á það sem venjulega er hafið bláa hafið. Leðjan spýtist mjúk og hlý milli tánna og andvarinn á meira skylt við hárþurrku en sjávargolu.
Við uppgötvuðum nýja gullnámu í dag við Anna. Framvegis munum við taka nettan leðjuslag í Hvalfirðinum á góðviðrisdögum, gegn aðgangseyri að sjálfsögðu. Með brjóstin á Önnu og rassinn á mér höfum við garantí fyrir góðri aðsókn. Ef einhver spengileg leggjasleggja vill slást með okkur þá endilega hafið samband.
————————–
Hvar kaupir maður miða ??
Posted by: Hugz | 4.08.2008 | 10:36:40
————————–
Þú mætir bara og snýrð þér að Talíbananum í g-strengnum. Hann tekur við aðgangseyrinum.
Posted by: Eva | 4.08.2008 | 11:01:38
————————–
Ég er engin leggjasleggja en tattúveraðar konur hafa löngum trekkt að. Hringið í mig fyrir næsta gigg! 😉
Posted by: Unnur María | 5.08.2008 | 20:21:39