Eymd dagsins

Menningarlíf mitt er í rúst. Ég hef mjög lítið farið í bíó, ekkert séð í leikhúsunum þetta haustið, og ekki farið á eina einustu tónleika á árinu, trúið þið því? Ég hef séð tvo þætti af House en annars horfi ég ekkert á sjónvarp nema Kastljósið þá sjaldan að ég er heima. Ég hef varla lifað neinu félagslífi heldur, ekki einu sinni haldið matarboð nema einu sinni síðan ég flutti inn í Mávahlíðina. Ég fór að vísu á bekkjarmót, góðu heilli, spilaði eitt skabbl við Pegasus og er að fara í morðgátuferð með Auði um næstu helgi en annars lítur út fyrir töluverða kvöldvinnu næstu vikur.

Endur fyrir löngu átti ég afmæli. Ætlaði að halda upp á það með pompi og prakt þegar ég hefði smalað börnum mínum heim frá útlöndum, ofan af fjöllum og út úr tukthúsum en hef ekki komið því í verk enn. Hvenær er orðið of seint að halda upp á afmæli?

Ég fékk leikhússmiða í afmælisgjöf en hef enn ekki fundið tíma til að nýta þá. Ég fékk líka gjafabréf í Smáralindina en er heldur ekki farin að koma því í verk að nýta það. Er samt búin að ákveða hvaða dásemd ég ætla að taka út á gjafabréfið. Dálítið sem bara einn maður fær að sjá. Ef ég finn þá einhvern tíma til þess að afhjúpa dýrðina. Sumt er bara ekki hægt að afgreiða á 20 mínútum.

Auglýsi hér með eftir fleiri klukkustundum í sólarhringinn svo ég komi nú einhverntíma einhverju af þessu í verk. Þigg einnig tillögur um forgangsröð þar sem Evan og Birtan geta engan veginn komið sér saman um hana.

 

Best er að deila með því að afrita slóðina

One thought on “Eymd dagsins

  1. ——————————————————

    Hefur þessi eini maður ekki góða tillögu að forgangsröðinni?

    Posted by: Anonymous | 12.10.2007 | 15:57:17

    ——————————————————

    Það er of seint að halda upp á afmæli þegar maður er dauður, sama hvaða tala/tölur eru á blöðrunum.

    Posted by: egill | 13.10.2007 | 18:33:09

Lokað er á athugasemdir.