Rangur misskilningur

Úps! Þarna munaði mjóu. Ég komst að því í gærkvöld að ég var með ranga dagsetningu á fluginu. Eins gott að ég var ekki búin að fremja fárviðrisgaldur.

Ég hef reyndar alltaf haft frekar illan bifur (bifur, hvurslags orð er það, verð að kíkja í orðsifjabókina þegar ég kem heim) á veðurgaldri eins og raunar öllum þeim inngripum mannsins í náttúruna sem geta raskað lífkerfinu. Það er ekki víst að vel færi ef margir legðu sig fram um að reyna að stjórna veðrinu. Eftir á að hyggja er það líka sérdeilis heimskulegt að reyna að tefja flug með veðurgaldri. Myndi kosta fullt af blásaklausu fólki vesen og vandræði og í raun ekki breyta neinu. Það hefði ekki annan tilgang en þann að ég fengi útrás fyrir mína eigin reiði og ég hef nógar leiðir til þess. Ég gæti t.d. látið Darra fara út með ruslið eða fundið einhver önnur ráð til að níðast á honum.

Ég held að ég verði að horfast í augu við að ég get ekkert gert til að koma í veg fyrir þessa flugferð. Og fyrst ég get það ekki vil ég a.m.k. hefnd. Ætla því að beina reiði minni beint að þeim samviskulausu skítalubbum sem þykjast ekkert geta gert til að stöðva þennan óskunda.

Hér með býð ég veglega peningaupphæð fyrir hár, neglur, húðflögur, tár, svita eða aðra líkamsvessa úr starfsmönnum félagsþjónustu Hafnarfjarðarbæjar.

Best er að deila með því að afrita slóðina