Ekki mistök heldur ofbeldi

Ef er miðað beint í augun á fólki, ef gleraugu eru rifin af því svo sé auðveldara að úða beint í augu, ef maður sem stendur upp við vegg og fylgist með aðgerðum er laminn harkalega í fótleggi með kylfu, táragasi er beitt EFTIR að mótmælendur sjálfir eru búnir að ná tökum á áflogahundum, þá heita það ekki mistök, heldur ofbeldi.

Halda áfram að lesa

Bíð eftir yfirlýsingu frá Geir

Það er óneitanlega af manni dregið eftir meira en þriggja daga mótmælamaraþon sem hófst aðfaranótt þriðjudags með því að anarkistakórinn hélt æfingu á prógrammi sínu af pólitískum vögguvísum framan við heimili nokkurra ráðherra. Nú bíð ég spennt eftir yfirlýsingu frá Geir. Annaðhvort er ríkisstjórnin búin að gefast upp eða þá að við getum búist við að löggan fái loksins ástæðu til að beita gasi. Þeir hafa beitt bæði piparúða og táragasi að óþörfu hingað til. Halda áfram að lesa

Maður mótmælir ekki fullur

Pólitískar aðgerðir krefjast þess að fólk hugsi rökrétt. Mótmæli og drykkjuskapur fara því illa saman og geta haft mikla hættu í för með sér. Ég hvet alla til að hafa þetta í huga og hætta aðgerðum snemma um helgina því götupartý geta auðveldlega leitt til stórslysa ef drukkið fólk í gremjukasti fer að drífa að.
Halda áfram að lesa

Auðvitað þarf að efla SS-sveitina

Bíddu nú við! Er ekki tilgangur lögreglunnar sá að vernda hinn almenna borgara og halda uppi lögum í landinu? Samkvæmt þessu er mikilvægara verkefni að vernda valdstjórnina gegn þeim sem hún hefur brotið á. Búið að skera niður hjá efnahagsbrotadeild, Landhelgisgæslunni og umferðalögreglunni, sem allt eru deildir sem þjóna hagsmunum almennings en sú deild sem tryggast þjónar valdstjórninni er hinsvegar efld. Halda áfram að lesa

Af hverju tekur Ingibjörg Sólrún ekki frí?

Fátt ef nokkuð hræðir mig meira en krabbamein. Það er andstyggilegur sjúkdómur og ég held að mér gæti aldrei orðið svo illa við nokkurn mann að ég fyndi ekki til með honum ef hann stæði frammi fyrir þeim ófögnuði.Þótt ég hafi fyrir löngu misst allt álit á Ingibjörgu Sólrúnu sem stjórnmálamanni, hef ég ekkert á móti henni sem manneskju. Hún og fjölskylda hennar eiga samúð mína alla og ég óska henni góðs bata. Það verður þó ekki fram hjá því litið að Ingibjörg Sólrún er í valdastöðu í samfélagi sem er gegnsýrt af spillingu. Það fer ekki hjá því að viðbrögð hennar í alvarlegum veikindum veki nokkrar áleitnar spurningar og fyrst ég sé engan annan varpa þeim fram, er best að ég taki af skarið og segi það sem aðrir láta sér nægja að hugsa. Halda áfram að lesa

Þakka boðið Stefán

Þessi fundur var um margt góður og upplýsandi. Jólaveinsuppákoman vekur áhugaverðar spurningar en er engan veginn það sem stendur upp úr hjá mér. Mér finnst gott að hafa á hreinu að það sé misskilningur að heimildir lögreglu til handtöku og valdbeitingar hafi verið rýmkaðar, ég gerði mig sjálf seka um að trúa því bara án þess að skoða gömlu lögin sjálf. Stefán Eiríksson kemur vel fyrir og það var snjallt af honum að tala hreinskilnislega um piparúða sem valdbeitingartæki en ekki varnaúða.

Halda áfram að lesa

Tek upp grímu í dag kl 13

Í dag mun ég í fyrsta sinn bera grímu í mótmælaaðgerð. Ég mun bera slíka grímu hér eftir í aðgerðum, nema andlitið á mér þjóni sérstökum tilgangi.

Á morgun kem ég fram í þætti Sverris Stormskers á útvarpi Sögu og ræði aktivisma og anarkisma. Á fimmtudag kem ég fram á opnum Borgarafundi í Iðnó og tala um borgaralega óhlýðni og ábyrgð mótmælenda. Eftir það mun ég ekki tjá mig um mótmæli aðgerðasinna undir nafni, nema þá með því að vísa í eitthvað sem ég hef þegar sagt. Halda áfram að lesa

Hversvegna er annað mál að brjóta rúðu í Nornabúðinni en Fjármálaeftirlitinu?

Ég nenni varla að standa í að svara þeim sem sjá ekki mun á því að brjórta rúðu í Nornabúðinni eða að brjóta rúðu í Fjármálaeftirlitinu eða skemma rafmagskapal í eigu 365 miðla. Ég ætla samt að útskýra þetta einu sinni enn, svona fyrir þá sem eru raunverulega að leita svara:Sko. Annarsvegar er ráðist gegn valdastofnunum og stórfyrirtækjum sem hafa misnotað vald sitt, endalaust logið og svikið og stefnt sjálfstæði þjóðarinnar í hættu með vanrækslu eða öðrum afglapahætti. Valdastofnanir og stórfyrirtæki geta svo beitt fyrir sig lögreglu, en hana skipa einu mennirnir í samfélagi okkar sem hafa lagalegan rétt til að beita ofbeldi, einu mennirnir sem hafa rétt til að beita vopnum og eru heilaþvegnir til þess að vinna hvaða skítverk sem er samkvæmt skipun. Eina leiðin til að draga valdastofnanir, stórfyrirtæki og valdamikla einstaklinga til ábyrgðar, er með öflugum þrýstingi hins almenna borgara og með því að ögra ramma laganna, sem oft eru sett sérstaklega til að vernda vald þeirra.

Hinsvegar er um að ræða einyrkja sem hefur ekki ógnað fjárhagslegu öryggi nokkurs manns, hefur nákvæmlega ekkert vald, engin vopn nema orð sín og hugarorku og ekki einu sinni líkamsburði til að slást við 12 ára barn hvað þá meir. Það er engin ástæða til þess að almennir borgara taki lögin í sínar hendur gagnvart mér, því ef ég geri eitthvað ólöglegt, eða er bara grunuð um það, þá er ekkert mál að fá lögregluna til að rannsaka það og hún mun sannarlega ekki halda hlífiskildi yfir mér ef ég vil fá frið til að ráðstafa fé og eignum annarra án samþykkis þeirra.

Rúðubrotin hjá Fjármálaeftirlitinu voru svar (mjög aggressívt svar) við þeirri valdhrokaaðgerð að loka opinberri stofnun fyrir fólki sem heldur uppi óþægilegum kröfum. Rúðubrotin í Nornabúðinni eru svar við þeim ósköpum að kona sem engu ræður og á enga einkaþotu og engan frænda í valdastöðu, skuli endalaust vera rífandi kjaft.  Þar fyrir utan, þá var ekki bankað upp á hjá mér á auglýstum afgreiðslutíma, heldur komið í skjóli nætur, sem gerir samanburðinn ennþá bjánalegri, því ég hef aldrei lokað á fólk þótt það eitthvað út á mig eða minn rekstur að setja. Ég hef ekki einu sinni lokað kommentakerfinu á blogginu mínu fyrir vitleysingum á borð við Björn bónda og Ólaf Hrólfs.

Ég hef séð töluvert marga viðra þá skoðun að mótmæli og kröfur eigi eingöngu að beinast gegn störfum manna en ekki þeim sjálfum persónulega. Ég er þessu ósammála. Á bak við valdastofnanir og stórfyrirtæki eru spilltir og valdamiklir einstaklingar sem oft hafa hag að því að viðhalda óréttlæti. Mér finnst í góðu lagi að angra þá, því fólk hættir ekkert að bera ábyrgð á gjörðum sínum þegar vinnudeginum lýkur. Það krefst hinsvegar meiri vandvirkni að heimsækja fólk en að mæta því í vinnugallanum.