Æ elsku Kallinn minn, Gunnar, ég skil svosem áhyggjur þínar af því að Ísland fyllist af sandnegrum og öðru hyski ef við slökum á harðræðinu gegn flóttamönnum. Við sjáum nú bara hvernig vestrænar þjóðir hafa hegðað sér á framandi menningarsvæðum svo því ættu þeir sem við höfum arðrænt og pínt að sýna okkar menningu sérstaka virðingu? Svo erum við svo fá og eins og allir vita fjölgar þetta sér eins og kanínur svo ef við tækjum bara við öllu pakkinu yrði allt orðið fullt af araba- og negrabastörðum hér innan skamms. Og allt myndi þetta lemja kerlingarnar sínar, láta krakkana ganga með viskustykki á hausnum og skopmyndateiknari Moggans þyrfti líkast til að fá lögregluvernd til að komast út í búð. 

Já, það er rétt, við þyrftum að takast á við menningarárekstra. Við þyrftum að berjast gegn viðhorfum fólks sem ekki hefur alist upp við virðingu gagnvart sjálfsögðustu mannréttindum. Kannski þyrftum við líka að umbera útvarpsstöð með arabiskri tónlist sem myndi stöðugt glymja í strætó. Einhver verður að aka strætó þegar Pólverjaglæponarnir snúa heim (eins gott að það verður ekki ég því þá myndu allir Breiðhyltingarnir enda uppi í Mosfellsbæ) og trúðu mér, þá fyrst þarf þjóðin að óttast um geðheilsu sína þegar slíkur tónlistarhryllingur dynur yfir, það er góð ástæða fyrir því að þetta er allt snarvitlaust þarna austur frá.

Já, þetta er erfitt en ég get nú samt alveg lofað þér því að ef landamæri yrðu afnumin og fólkið sem þú lítur á sem rusl fengi þar með sama ferðafrelsi og við njótum, þá yrðu þeir fáir sem hefðu áhuga á að setjast að á Íslandi. Flestir þeirra sem hafa sótt um hæli á Íslandi á síðustu árum voru á leið til Kanada og höfðu aldrei vitað neitt um Ísland fyrr en þeir voru stoppaðir á Keflavíkurflugvelli. En jú, einhverjir hafa sérstakan áhuga á Íslandi og til að persónugera nú vandann ætla ég að segja þér eina litla sögu af náunga sem vill setjast hér að, því ruslið sem þú vilt losna við eru nefnilega raunverulegar, lifandi manneskjur.

Noordin Alazawi, (einn þessara ‘glæpamanna’ sem voru sendir á sorphauga Grikklands þann 14. okt) var 16 ára og bjó í Bagdad þegar pabbi hans var drepinn í stríði sem Ísland á aðild að. Svo kaldhæðnislega vill til að pabbinn var drepinn vegna þjónkunar hans við Bandaríkjamenn og samkvæmt hefðinni er öll fjölskyldan meðsek. Nour hefur nú verið á flótta í meira en 3 ár. Hann hefur orðið viðskila við mömmu sína og systur á flóttanum og þjáist af kvíða á alvarlegu stigi.

Noor hafði engan áhuga á að koma til Íslands en þar lenti hann og hann var svo heppinn að eignast vini. Hann var kominn í vinnu, var orðinn heimagangur á íslensku heimili og talaði um það fólk sem fjölskyldu sína; var semsagt loksins farinn að finna fyrir einhverskonar öryggi þegar fótunum var kippt undan honum eina ferðina enn. Hann var handtekinn án fyrirvara og fékk 10 mínútur til að pakka. Daginn eftir að hann kom til Grikklands var honum vísað á götuna. Hann á að vísu eitthvað af íslenskum krónum en þær eru minna virði en klósettpappír annarsstaðar en á Íslandi. Hann hefur grátið nánast viðstöðulaust í 3 daga og hefur lítið sem ekkert sofið.

Líf þessa unga manns hefur verið á pásu frá því að hann var 16 ára því flóttamenn eiga sjaldnast kost á menntun eða starfi, hvað þá að stofna fjölskyldu. Noor á engan kost á eðlilegu lífi sem flóttamaður í Grikklandi og það sem er sérstakt við hans tilfelli er ekki það hvað hann er illa settur, heldur einmitt hitt að hann á þó einhverja vini í veröldinni. Flestir flóttamenn standa aleinir.

Ég og þú berum persónulega ábyrgð á stríðinu í Írak Gunnar. Við reyndum ekkert alvarlegt til að fá Davíð og Halldór dæmda fyrir landráð og afturkalla stuðning þjóðarinnar við þetta stríð. Og Gunnar, við getum ekki leyft okkur að taka þátt í að leggja lönd annarra í rúst en neita svo fórnarlömbunum um aðstoð. Við berum ábyrgð gagnvart Noordin Gunnar, ég og þú. Gagnvart Noordin og öllum hinum. Noodin er nefnilega ekki bara einhver náungi, heldur Náungi okkar, meðbróðir okkar, einn af okkar allra minnstu bræðrum.

Bendi á þessa frábæru umfjöllun og einnig vil ég vekja sérstaklega athygli á athugasemd Helga Jóhanns Haukssonar í svarhalanum.