Barnabókakynning Kvennablaðsins

bkur-688x451Sú var tíð að helstu vandamál barna voru úlfar, tröll og vondar stjúpur. Í flóknum heimi nútímans eru helstu vandamálin hinsvegar fordómar og staðalmyndir. Við hjá Kvennablaðinu fögnum því endurnýjun á barnabókamarkaðnum og hvetjum lesendur til að kynna sér þessar nýútkomnu bækur.

dsaDísa litla er haldin átröskun og borðar stundum ekkert dögum saman. Einn daginn verður hún svo fjarska svöng og graðgar í sig öllu sem að kjafti kemur. En græðgin kemur henni í koll og hún kemst að raun um að það er hryllilega erfitt að gubba brauði.

Þegar Dísa kynnist Míu breytist líf hennar því Mía kennir henni bæði að fela átröskunina fyrir mömmu og pabba og gefur henni góð ráð um það hvaða fæðu sé auðveldast að æla.

Falleg saga um óvenjulega vináttu og góð ráð handa ungum stúlkum sem vilja halda sér grönnum.
afiHver segir að allir afar eigi að vera traustir hæglætismenn sem segja hundleiðinlegar sögur af því hvernig jólin voru í gamla daga og gefa börnum brjóstsykur úr blikkdós? Þannig er afi hans Edda Þórs að minnsta kosti ekki.

Afi hans Edda Þórs er eldhress klæðskiptingur sem starfar sem skemmtikraftur í gæsaveislum og fær sér jafnan feita jónu til að ná sér niður eftir vinnudaginn.

Kötturinn Faggi, sem er skilgetið afkvæmi feðraveldisins, er ekkert alltof ánægður með lífsstíl afa og það kemur í hlut Edda Þórs að útskýra fyrir Fagga hvernig staðalmyndir eyðileggja líf okkar.
pabbiÞegar pabbi göltur fær sér karlakók verður hann stundum voðalega reiður.  Litlu gríslingarnir kenna börnunum hvar er best að fela sig á meðan hann lemur mömmu og hvernig er best að hugga mömmu og þrífa æluna þegar pabbi loksins sofnar.

Litlu gríslingarnir vita að pabbi er ekki vondur göltur, hann er bara með sjúkdóm sem heitir alkóhólismi. Þeir vita líka að mamma gylta er ekki aumingi þótt hún fari ekki frá honum, hún er nefnilega með sjúkdóm sem heitir meðvirkni.

Hugljúf saga sem kennir börnunum að lifa við alkóhólisma án þess að láta fordóma og reiði stjórna lífi sínu.

fa-768x555– Nennirðu ekki að taka á matarfíkn barnanna þinna? – Máttu ekkert vera að því að elda?
– Finnst þér of erfitt að rífa þig upp á laugardagsmorgni til að banna þeim að borða 600 grömm af sælgæti yfir morgunsjónvarpinu?

Það er óþarfi að örvænta. Offita er nefnilega æðisleg svo nú getur þú haldið áfram að ala krakkana á mæjónesi og pítsum, ef þú bara kennir þeim að virða líkama sinn eins og hann er.

 

mammaMamma er svolítið lasin og þarf þess vegna alltaf að leggja sig nokkra klukkutíma eftir hádegið, þegar hún er búin að taka pillurnar sínar.

Á meðan mamma leggur sig, vinnur Svenni litli heimaverkefnin sín alveg sjálfur og lærir sjálfur að elda sér hafragraut og hengja upp þvottinn. Hann fer hljóðlega að öllu og gætir þess að trufla ekki mömmu sína svo hún vakni nú ekki í fúlu skapi.

Lærdómsrík bók sem eflir sjálfstæði barna og kennir þeim tillitssemi gagnvart foreldrum sínum.

 

 

lappiAmma Línu býr í öryrkjablokk þar sem bannað er að halda gæludýr og nú á að lóga hundinum hennar, honum Lappa.

Lappi er hræddur við að deyja og flýr lengst upp í sveit.
Lína litla, sem er ljómandi falleg og góð stúlka, deyr ekki ráðalaus.  Hún stelur mótorhjóli og fer sjálf upp í sveit og sækir Lappa.

Lína hjálpar Lappa að sætta sig við örlög sín og fer með hann til dýralæknisins sem gefur honum sprautu.

 

 

 

kynjaglerauguKalli heldur að lífið sé flókið og að ýmis félagsfræðileg fyrirbæri eigi sér margþættar skýringar, bæði líffræðilegar og sögulegar. Þegar Stína færir honum kynjagleraugu verður honum ljóst að um leið og maður lærir orðin feðraveldi, kynjakerfi, staðalmyndir og hlutgerving, er maður kominn með einfaldar og þægilegar skýringar á hverju sem vera skal.

Kalli setur upp kynjagleraugun og fær þannig innsýn í kynjaveröld feminismans, þar sem orð eru merkingarlaus og hugarburður flokkaður sem vísindi.

*Myndir sem voru  endurnýttar við gerð þessara bóka má sjá hér:
Dísa litla og lotugræðginEldhessi afi minn, Pabbi er bara svo veikur, Ég elska hvern einasta kepp, Mamma þarf að leggja sig, Það á að lóga honum Lappa, Kalli, Stína og kynjagleraugun

Deila færslunni

Share to Facebook