Rjúfum umsátrið um Gaza
Útifundur á Lækjartorgi, miðvikudaginn 5. mars, 12:15
Efnt verður til útifundar á Lækjartorgi í hádeginu á morgun, miðvikudaginn 5. mars klukkan 12:15, til að mótmæla blóðbaðinu á Gazaströnd.
Kröfur dagsins eru: Stöðvum fjöldamorðin og rjúfum umsátrið um Gaza.
Ræðumenn verða Katrín Fjeldsted læknir og Ögmundur Jónasson alþingismaður.
Fundarstjóri er Sveinn Rúnar Hauksson formaður Félagsins Ísland-Palestína.

—

Auðvitað bíttar það ekki baun í rassgati þótt nokkrar hræður þenji sig á Lækjartogi. Fyrst sú vesæla skepna almenningur hefur ekki einu sinni döngun í sér til að stöðva aðra eins óhæfu og þá að fórnarlambi barsmíða séu dæmdar 150 þús. kr í miskabætur á sama tíma og annar maður fær bætur upp á 300 þús. af því að bloggari kallaði hann rasista, hvaða líkur eru þá á því að hann láti sig það varða þótt fólk sé brytjað niður í fjarlægum heimshlutum?

Ég þarf að komast til Palestínu, bara til að þurfa ekki að segja barnabörnunum mínum að framlag mitt til fórnarlamba þessarar helfarar hafi verið hálftímastaða á Lækjartorgi, jafnvel með skilti! Ég væri farin ef ég hefði ekki tekið mjög heimskulega ákvörðun í byrjun október en staðan er sumsé þannig að ég gerði STÓÓÓÓR mistök og hef ekki efni á að hlaupa frá skuldbindingum mínum. Ég gæti það sjálfsagt, meiri stórlaxar en ég hafa lýst sig gjaldþrota, jafnvel oftar en einu sinni til þess einmitt að fá það sem þeir vilja. Það virðist m.a.s. gúterað, allavega hjá þeim sem álíta að meira sé aldrei nóg. En ég gútera það ekki og þegar upp er staðið er það mitt álit sem vegur þyngst.

Ég þarf að komast til Palestínu og ég þarf líka að komast héðan. Þarf að komast frá þessu helvítis veðurfari. Þarf að komast upp úr atvinnuhjólfarinu sem ég búin að festa mig í. Þarf að komast burt frá mestu sjálfsniðurlægingu sem ég hef gert mig seka um síðan ég lagðist í hugarvíl yfir stórkostlegasta happi tilveru minnar hér um árið. Þá hló Marbendill.

Sál mín er hér með til sölu á skitnar 2 milljónir. Afhendist eftir 2ja mánaða veru í Palestínu, eftir það er ég tilbúin til að taka fullan þátt í allri þeirr lygaþvælu og spillingu sem viðgengst í íslenskri pólitík. Ég skal fara á þing fyrir Sjálfstæðisflokkinn þessvegna, sé ekki að það skipti nokkru máli hver sér um að míga yfir Villa eða múta fylgislausum smákóngum. Ég er alveg jafn sæt og Gísli Marteinn. Æ, og skrokkurinn, hann má fara með á uppboðið þessvegna, hann er allavega söluvænlegri en sálin. Hér með leiðréttist; líkami minn er til sölu fyrir skitnar 6 milljónir, (vitanlega er líkaminn dýrari en sálin enda bæði fjölhæfari og endingarbetri) fyrstur kemur, fyrstur fær, afhendist eftir 2ja mánaða dvöl í Palestínu. Afsláttur umræðanlegur ef einhver vill bæði líkama minn og sál í einum pakka.