Það stendur ekki utan á þér hvort þú trúir á Davíð. En þú finnur, að lífið þitt verður dýrmætara. Þá ertu fær um að geta elskað Davíð, grátið og hlegið. Fær um að geta fyrirgefið hrunstjórninni. Kannt að samgleðjast auðmönnum, þegar þeir fá fyrirtækin sín aftur á silfurfati, í stað þess að öfunda þá.

Þetta segir prófessor við Gvuðfræðideild HÍ. Nýútkomin rannsóknarskýrsla hans um orsakir efnahagshrunsins leiðir í ljós að meginástæðan fyrir hruninu var sú að skríllinn hafði fjarlægst Fjárhirði þjóðarinnar og tileinkað sér svokallað raunsæi. Að sögn prófessorsins voru það einkum vinstri sinnaðir skemmtiþjófar sem predikuðu raunsæisstefnu í stjórnmálum og bitnaði það mjög á grillveislum landsmanna. Margir þorðu ekki að að krydda svínakjötið með gulli en grilluðu þess í stað sjálft gvuðslambið sem bar synd heimsins. Staðfestir prófessorinn aukinheldur það sem marga hefur grunað að veikindin hafi Drottinn hersveitanna lagt á Fjárhirði þjóðarinnar í þeim tilgangi að hreinsa Íslendinga af góðærissyndunum.

Hann fórnaði sér fyrir syndir okkar og var saklaus krossfestur sem hver annar þjófur til þess að hver sem á hann trúir glatist ekki heldur kjósi Sjálfstæðisflokkinn um aldir alda. Og það er töff. Að trúa á kapítalismann er töff.

Prófessorinn kynnti rannsóknarskýrslu sína í  Bústaðakirkju um helgina. Ljósmyndin á töflunni er söguleg, því að hún er sennilega ein hin síðasta af Davíð Oddssyni forsætisráðherra, áður en hann veiktist alvarlega aðfaranótt miðvikudagsins 21. júlí 2004.  Textinn á töflunni er úr fermingarkveri Silfurskeiðabandalagsins en skemmtiþjófar Stöðvar tvö eiga heiðurinn af þýðingunni.

Þjóðaratkvæðagreiðslur eru skref í átt að lýðræði. Það er þó til lítils að boða til þjóðaratkvæðagreiðslu ef ekkert er gert með niðurstöðu hennar.

Helstu rökin gegn þjóðaratkvæðagreiðslum eru þau að almúganum sé ekki treystandi fyrir mikilvægum ákvörðunum. Við þurfum mannvitsbrekkurnar 63 sem sitja á Alþingi til þess að passa upp á okkur. Ef málum er skotið til þjóðarinnar gætu alkóhólistar, glæpamenn og kjánar haft áhrif á niðurstöðu, ólíkt því sem gerist í þinginu.

Nú hefur mbl.is upplýst okkur um að stjórnarflokkarnir séu hættir við að koma stjórnarskrármálinu í gegnum þingið. Í fyrstu hélt ég að þetta væri bara moggalygi en stjórnarliðar þegja þunnu hljóði og ég held ekki að skýringin sé sú að þeir séu allir uppteknir við að baka vatnsdeigsbollur.

Árið 2011 sæmdi vefritið Gagnauga Ögmund Jónasson viðsnúningsverðlaununum Steingrímunni. Tilefnið var sá gagngeri viðsnúningur Ögmundar í afstöðu til alræðishyggju sem birtist í skyndilegri hrifningu hans á þeirri hugmynd að veita lögreglu heimildir til að njósa um fólk sem ekki er grunað um að hafa framið glæp af neinu tagi.

Ég tilnefni hér með ríkisstjórnina til Steingrímunnar 2013 fyrir viðsnúning sinn í afstöðu til lýðræðis.

Athugið að þetta snýst ekki bara um stjórnarskrána heldur ekki síður lýðræðismál. Þeir sem ekki eru hrifnir af stjórnarskrárfrumvarpinu fagna kannski í dag en þeir sem styðja valdníðslu í þessu máli gætu skipt um skoðun næst þegar kemur til álita að skjóta máli til þjóðarinnar.

Þórarinn haki hannaði Steingrímuna

Feitabollan sívinsæla Sigurjón digri, gekkst í dag undir skurðaðgerð á stórutá. Mun ástæðan vera sú að látinn tvíburabróðir Sigurjóns, Gúllimann gildi, hafði tekið sér bólfestu í aukatá sem Sigurjóni hafði vaxið hin síðari ár og var tekinn upp á því að éta í gegnum hann.

„Innst inni hef ég aðeins tíu tær en Gúlllimann var farinn að vaxa út úr stórutá. Ég hefði  sko samt alveg leyft Gúllimann bróður að hanga á löppinni ef hann væri ekki svona helvíti ódannaður í veislum. Það er svolítið svona ósmekklegt að vera með lappirnar uppi á borði í fermingarveislum og hann tók engu tiltali, þannig að það var ekki um annað að ræða en að kötta á hann“ sagði Sigurjón í viðtali við Pistilinn.

Sigurjón segist þrátt fyrir allt vera þakklátur fyrir að hafa fengið að kynnast Gúllimann en hann náði upphaflega sambandi við hann í gegnum samskiptavefinn facebook sem að sögn Sigurjóns virkar mun betur en andaglas.

Sigurjón digri gekk undir nafninu Grjóni spaghetti áður en Gúllimann bróðir tók upp á því að neyða hann til að gúlla í sig mat. Hér eru þeir bræður í náttfatapartýi og búnir að éta gestgjafann út á gaddinn.