Björgum löggunni!

Hún sker mann hreinlega í hjartað myndin á bls. 13.

Screenshot (143)

 

Örvænting þessara kvöldu manna er komin á það stig að þeir eru farnir að auglýsa í blöðunum til að reyna að vekja athygli almennings á skelfilegri líðan sinni. Ég sé ekki annað en að einu rökréttu viðbrögðin við þessu neyðarkalli séu þau að uppræta þetta andstyggilega starf með öllu enda er þetta sá veruleiki sem við okkur blasir.

Persónuleg kynni mín af lögregluþrælum sanna aukinheldur að þeir eru upp til hópa menn með brotna sjálfsmynd sem leiddust út í þennan hrylling af einskæru sjálfsvirðingarleysi.

Ég legg til að þegar í stað verði komið á lögguathvörfum, þar sem menn sem vilja komast út úr þessum mannskemmandi og ofbeldisfullu aðstæðum, geta fengið faglega aðstoð til að hætta og byggja upp nýja sjálfsmynd.

Sumir kunna að halda því fram að hér séu á ferð hugsjónamenn eða spennufíklar sem eru tilbúnir til að taka áhættu, að sumir þeirra sæti ekki þeirri meðferð sem hér er lýst, hafi tekið þetta að sér sjálfviljugir og hafi engan áhuga á að hætta. Enginn skyldi hlusta á slíkar hugmyndir og allra síst þegar fórnarlömbin sjálf halda þeim fram. Hafa ber í huga að lögregluþrælar hafa verið heilaþvegnir til að hlýða yfirboðurum sínum í blindni. Þeir eru allir sem einn haldnir Stokkhólmsheilkenninu enda dettur varla nokkrum heilvita manni í hug að einhver velji sér annað eins hlutskipti.

One thought on “Björgum löggunni!

  1. ———————————-

    Hvaða vitleysa. Allar löggur sem ég þekki eru stórgáfað og efnilegt ungt fólk sem er að fjármagna nám í kjarneðlisfræði og bókmenntum með þessu vanþakkláta og smáða starfi.

    Posted by: Toggi | 21.09.2011 | 9:16:27

    ———————————-

    Sko Toggi, það náttúrulega fjármagnar enginn nám á þessum smánarlaunum. Auðvitað reyna þessir vesalings menn að halda andlitinu með því að gefa allskonar mistrúverðugar skýringar á þessar stöðu sinni. Segjast kannski vera að kaupa íbúð eða reka heimili eða eitthvað í þá veruna. En það er bótakerfi í landinu og það trúir því enginn heilvita maður að menn láti annað eins yfir sig ganga bara til að ná inn nokkrum krónum. Rökrétta skýringin er sú að þessir menn séu á kafi í fíkniefnaneyslu og maður í örvæntingarfullri leit að næsta skammti veit að hann þarf bara að sætta sig við barsmíðar og niðurlægingar, og það um helgar!

    Posted by: Eva | 21.09.2011 | 10:17:04

    ———————————-

    NEI! helvítis löggurnar standa með helferðarvaldstjórninni og ráðast á heimavarnarliðið þegar þeir bera út kúgaðan almenning!
    Ef þeir myndu standa með fólkinu þá myndu þeir fremja valdarán fyrir okkur!

    Posted by: toggi 2 | 21.09.2011 | 12:18:58

    ———————————-

    Auðvitað standa þeir með valdstjórninni en það má samt ekki dæma þessa sjúklinga glæpamenn. Það er Stokkhólmsheilkennið sem er að verki sjáðu til.

    Ég tel samt að það væri glapræði að gera löggæslu ólöglega enda má ætla að þeir menn sem leiðast út í löggæslu á eigin forsendum, svokallaðir handrukkarar, séu lamdir ennþá meira og þurfi jafnvel að standast enn strangari kröfur um að vera til taks á öllum tímum sólarhrings.

    Rétta leiðin til að uppræta löggæslu og kúgunina sem henni fylgir er því augljóslega sú að gera kúnnan ábyrgan. Það þarf að refsa þeim sem hringja í lögguna og krefjast þjónustu enda ber þetta fólk enga virðingu fyrir tilfinningum þeirra eða líkama fyrst það er tilbúið til að senda þá í hættulegar aðstæður og það þegar aðrir eru í fríi.

    Posted by: Eva | 21.09.2011 | 12:38:16

    ———————————-

    ég hef lent í löggum sem sinna starfi sínu ílla og svo hef ég lent í löggum sem sinna starfi sínu vel.

    ég hef lent í Þingmönnum sem sinna starfi sínu ílla. ég hef lent í Þingmönnum sem sinna starfi sínu vel.
    samt held ég að prósentulega séð séu fleiri Lögregluþjónar sem sinna sínu starfi vel en Þingmenn.
    munurinn er að Þingmenn ákveða sín laun sjálfir en Lögregluþjónar ekki..

    Posted by: Örn bergmann | 21.09.2011 | 12:49:42

    ———————————-

    Meðan ekkert liggur fyrir um það hvað það merkir að sinna starfi sínu vel, hvað þá rannsóknir á því hvernig einstaka stéttir standa sig, ætla ég ekki að taka neina afstöðu til þess hvort löggur standa sig betur eða verr en þingmenn.

    Það er hinsvegar enginn skikkaður til að verða lögga og menn vita þegar þeir velja sér þetta starf að þeir hafa ekki verkfallsrétt. Ef lögregluþjónar líta á sig sem fórnarlömb og treysta sér ekki til að segja upp þessu voðalega starfi, nú þarf væntanlega einhver að hjálpa þeim til þess.

    Ég býð hér með fram aðstoð mína. Þeir sem hafa leiðst út í löggæslu en vilja komast út úr vítahringnum og endurheimta sjálfsvirðingu sína, geta haft samband við mig og ég mun finna áhugasama anarkista sem vilja vera þeim til halds og trausts.

    Posted by: Eva | 21.09.2011 | 13:04:54

    ———————————-

    Hamingjusama löggan er mýta! Leggjum niður störf lögreglumanna, bönnum þau, og björgum þeim úr heljargreipum starfsins.

    Posted by: Kristinn | 21.09.2011 | 16:47:57

    ———————————-

    Væntanlega er kvöld- og helgarvinna sem hífir upp kaupið.

    Annars styð ég kjarabaráttu lögreglumanna.

    Posted by: Hermann Stefánsson | 21.09.2011 | 18:11:05

    ———————————-

    Voðalega eru margir sem ná ekki satírunni…

    Posted by: Einar Þór | 21.09.2011 | 19:30:39

    ———————————-

    Eru þetta satíruauglýsingar? Þær eru auðvitað yfirdrifnar, eins og Eva flímar með. En það er glatað að stétt hafi ekki verkfallsrétt. Það eru sömu réttindi og rétturinn til að mótmæla.

    Posted by: Hermann Stefánsson | 21.09.2011 | 22:31:27

    ———————————-

    Ég ætla að láta öðrum eftir að ræða satíruna :Ð

    Hvað verkfallsréttinn varðar þá vil ég þvert á móti fella hann niður hjá miklu fleiri stéttum. Það er út í hött að heilbrigðisstarfsfólk, kennarar og aðrir sem gegna þannig störfum að launagreiðandinn græðir á verkfalli, sé sett í þá aðstöðu að þurfa að bregðast skjólstæðingum sínum til að knýja fram launahækkun.

    Nú vil ég náttúrulega stórtækar stjórnkerfisbreytingar en að því gefnu að við sitjum uppi með alþingi í núverandi mynd, væri langhentugast að öll laun opinberra starfsmanna yrðu miðuð við laun þingmanna. Laun hverrar stéttar yrðu X% af launum þingmanna og allar hækkanir eða lækkanir næstu 10 árin í krónutölu, jafnt á línuna. (enda eru engin rök fyrir prósentuhækkunum og stórfurðulegt að almenningur skuli sætta sig við þær) Svo mætti endurskoða launakerfið eftir það. Ég yrði ekkert hissa þótt þetta hefði í för með sér langvarandi stöðugleika.

    Posted by: Eva | 22.09.2011 | 10:34:40

    ———————————-

    En öll verkföll ríkisstarfsmanna koma niður á einhverjum, þannig myndast þrýstingurinn: Verkföll öskukalla niður á heimilunum, strætisvagnastjóra á þeim sem taka strætó og kennara á nemendum. Ætti þá að afnema verkfallsrétt ríkisstarfsmanna? Starfsfólk einkafyrirtækja fer ekki í verkfall vegna þess að þá væri það rekið. Ef einhver græðir á verkfalli er nær að þau séu þá launuð skv lögum.

    Verkfallsrétturinn er í raun víðast óvirkt tæki en það er meðal annars vegna þess að verkalýðsfélögin eru ekki verkalýðsfélög heldur eitthvað allt annað, fjárfestingafélög.

    Posted by: Hermann Stefánsson | 22.09.2011 | 12:52:47

    ———————————-

    Já það ætti að afnema verkfallsrétt ríkisstarfsmanna en jafnframt tryggja að engin stétt geti dregist aftúr úr, með því að binda öll laun við laun þingmanna og hætta þessu prósentukjaftæði.

    Verkföll eru ekki bara óvirkt tæki, þau hafa heldur ekkert upp á sig því eftir hrinu verkfalla hækkar verðlag á öllum nauðsynjavörum og þjónustu.

    Posted by: Eva | 22.09.2011 | 16:08:09

    ———————————-

    Þingmannalaunatenging er reyndar prósenta. Norræna velferðarstjórnin hefur talað um að miða við að forsætisráðherralaun séu hæst. Ég sé ekki að hún hafi klærnar í einkageiranum með það.

    Hinsvegar finnst mér að ekki aðeins ættu lögreglumenn að fá verkfallsrétt og launahækkun heldur einnig skyldunám í lífsleikni, undirstöðuatriðum í heimspeki og smávegis af Thoreau.

    Posted by: Hermann Stefánsson | 22.09.2011 | 18:21:42

    ———————————-

    Já, grunnurinn er prósentutenging en launahækkanir eða lækkanir mega ekki vera í prósentum. Ef þingmaður hefur þörf fyrir 3000 kr launahækkun, þá hefur skúringakonan ekkert síður þörf fyrir hana. Þetta fyrirkomulag yrði mikið aðhald fyrir þingmenn því með því að hækka launin sín væru þeir jafnframt að mjókka bilið milli stétta.

    Hvað menntun lögreglumanna varðar þá þarf að breyta eðli starfins. Það er ofbeldiseðli stofnunarinnar sem er vandamálið, ekki menntun löggunnar þótt vissulega sé menntun alltaf ágæt.

    Posted by: Eva | 22.09.2011 | 20:03:45

Lokað er á athugasemdir.